തിരുവനന്തപുരം : വർധിപ്പിച്ച ക്ഷേമ പെൻഷനായ 1600 രൂപ വിഷുവിനുമുമ്പ്‌ ഗുണഭോക്താക്കളുടെ വീടുകളിലെത്തുമെന്ന്‌ ധനമന്ത്രി ടി എം തോമസ്‌ ഐസക്‌ പറഞ്ഞു. വിഷു കിറ്റും വിതരണം ചെയ്യും. എപിഎൽ വിഭാഗത്തിൽപ്പെട്ടവർക്ക്‌ 15 രൂപ നിരക്കിൽ 10 കിലോഗ്രാംവീതം അരിയും വിഷുവിനുമുമ്പ്‌ ലഭ്യമാക്കും. എല്ലാ സ്‌കീം വർക്കേഴ്‌സിനും വർധിപ്പിച്ച വേതനവും പ്രതിഫലവും ഏപ്രിലിൽത്തന്നെ നടപ്പാക്കുമെന്നും ധനമന്ത്രി വ്യക്തമാക്കി. രണ്ടുലക്ഷം പേർക്ക്‌ കാർഷിക മേഖലയിലും മൂന്നുലക്ഷം പേർക്ക്‌ കാർഷികേതര മേഖലയിലും തൊഴിലുറപ്പാക്കും.
100 ദിനത്തിൽ 50,000 തൊഴിൽ പ്രഖ്യാപിച്ചശേഷം ഒരുലക്ഷത്തിലേറെ തൊഴിലവസരം ഉറപ്പാക്കിയ അനുഭവം കേരളത്തിനു മുന്നിലുണ്ട്‌. സാധാരണക്കാരുടെ കുടുംബങ്ങളിലെ കുട്ടികൾക്കും വിദ്യാഭ്യാസത്തിന്‌ അനുയോജ്യമായ തൊഴിലവസരം തുറക്കും. പുരുഷൻമാരെ അപേക്ഷിച്ച്‌ നാലിരട്ടിയാണ്‌ സ്‌ത്രീകൾക്കിടയിലെ തൊഴിലില്ലായ്‌മ. ഇത്‌ പരിഹരിക്കും. സർക്കാർ ജോബ്‌ പോർട്ടൽ ഏപ്രിൽ ഒന്നുമുതൽ നിലവിൽവരത്തക്ക വിധത്തിൽ ഒരുക്കങ്ങൾ ആരംഭിച്ചു. ഫെബ്രുവരി ആദ്യവാരം ഉദ്യോഗാർഥികളുടെ രജിസ്‌ട്രേഷൻ തുടങ്ങുമെന്നും അദ്ദേഹം പറഞ്ഞു.
