യുവാക്കളുടെ ഹരമായ കെടിഎം ഡ്യൂക്ക് മോട്ടോർസൈക്കിളുകളുടെ നിരയിലെ ഏറ്റവും വില കുറഞ്ഞ മോട്ടോർസൈക്കിളാണ് കെടിഎം 125 ഡ്യൂക്ക് (KTM 125 Duke). ഈ മോട്ടോർസൈക്കിളിന്റെ പുതിയ പതിപ്പ് ആഗോള വിപണിയിൽ അവതരിപ്പിച്ചു. അടുത്തിടെയായി കമ്പനി തങ്ങളുടെ ഡ്യൂക്ക് ലൈനപ്പ് നവീകരിച്ച് വരികയാണ്. ഇതിന്റെ ഭാഗമായിട്ടാണ് 125സിസി ഡ്യൂക്കും പുതുക്കിയിരിക്കുന്നത്. നേരത്തെ 250 ഡ്യൂക്ക്, 390 ഡ്യൂക്ക് എന്നിവ പുതുക്കിയിരുന്നു. 2024 മോഡൽ കെടിഎം 125 ഡ്യൂക്ക്ന്റെ വിലയും സവിശേഷതകളും നോക്കാം. മറ്റ് ഡ്യൂക്ക് മോട്ടോർസൈക്കിളുകൾക്ക് സമാനമായ നവീകരണങ്ങളോടെയാണ് പുതിയ മോഡൽ കെടിഎം 125 ഡ്യൂക്ക് വരുന്നത്. ഇതിൽ ഡിസൈൻ മാറ്റങ്ങളും പുതിയ ഫീച്ചറുകൾ കൂട്ടിച്ചേർത്തതും ഉൾപ്പെടുന്നു.
125 ഡ്യൂക്ക് ബ്രാൻഡ് നിലവിൽ വിൽക്കുന്ന ഏറ്റവും വില കുറഞ്ഞ മോട്ടോർസൈക്കിളാണ്. പുതുക്കിയ ഡിസൈനും പുതിയ സവിശേഷതകളുമായി വരുന്ന ഈ മോട്ടോർസൈക്കിൾ ഇന്ത്യൻ വിപണിയിൽ അടക്കം ജനപ്രിതി നേടുമെന്ന് ഉറപ്പാണ്. കെടിഎം 125 ഡ്യൂക്ക് മോട്ടോർസൈക്കിളിന്റെ ഡിസൈൻ കമ്പനി പൂർണ്ണമായും നവീകരിച്ചിട്ടുണ്ട്. 390 ഡ്യൂക്കിൽ നിന്ന് പ്രചോദനം ഉൾക്കൊണ്ടാണ് ഈ ചെറിയ ഡ്യൂക്കിന്റെ ഡിസൈനും വരുന്നത്. ഇന്ത്യൻ വിപണിയിൽ ഇപ്പോൾ വിൽപ്പനയിലുള്ള മോഡലുമായി താരതമ്യപ്പെടുത്തുമ്പോൾ കൂടുതൽ മസ്കുലാറായ ബോഡി വർക്കുമായിട്ടാണ് 2024 മോഡൽ കെടിഎം 125 ഡ്യൂക്ക് വരുന്നത്. ആഗോള വിപണിയിൽ അവതരിപ്പിച്ച പതിപ്പിൽ പുതിയ എൽഇഡി ഹെഡ്ലാമ്പ്, വലിയ ടാങ്ക് ഷ്രൌഡ്സ്, മസ്കുലർ ഫ്യൂവൽ ടാങ്ക് എന്നിവയും ഈ ബൈക്കിലുണ്ട്.
കെടിഎം 125 ഡ്യൂക്ക് മോട്ടോർസൈക്കിളിന് കരുത്ത് നൽകുന്നത് 124.9 സിസി, ലിക്വിഡ് കൂൾഡ് സിംഗിൾ സിലിണ്ടർ എഞ്ചിൻ തന്നെയാണ്. ഈ എഞ്ചിൻ 14.7 ബിഎച്ച്പി മാക്സിമം പവറും 11 എൻഎം പീക്ക് ടോർക്കും ഉത്പാദിപ്പിക്കുന്നു. 6 സ്പീഡ് ഗിയർബോക്സുമായിട്ടാണ് ഈ എഞ്ചിൻ വരുന്നത്. എഞ്ചിനിൽ മാറ്റങ്ങളില്ലാതെയാണ് ബൈക്ക് ആഗോള വിപണിയിൽ എത്തിയിരിക്കുന്നത്. ഇന്ത്യയിലെത്തുമ്പോൾ എഞ്ചിൻ പുതിയ എമിഷൻ മാനദണ്ഡങ്ങൾക്ക് അനുസരിച്ച് പുതുക്കുമെന്ന് ഉറപ്പാണ്. പുതിയ സ്റ്റീൽ ട്രെല്ലിസ് ഫ്രെയിമും പ്രഷർ ഡൈ-കാസ്റ്റ് അലുമിനിയം സബ് ഫ്രെയിമുമാണ് പുതിയ മോഡലിൽ കമ്പനി നൽകിയിട്ടുള്ളത്. മുൻവശത്ത് അപ് സൈഡ് ഡൌൺ ഫോർക്കുകളിലും പിന്നിൽ ഓഫ് സെറ്റ് മോണോഷോക്കുമാണ് സസ്പെൻഷനായി നൽകിയിട്ടുള്ളത്.
390 ഡ്യൂക്കിൽ നിന്ന് കടമെടുത്ത 5 ഇഞ്ച് ടിഎഫ്ടി സ്ക്രീനാണ് 2024 മോഡൽ കെടിഎം 125 ഡ്യൂക്കിൽ കമ്പനി നൽകിയിട്ടുള്ളത്. ഇതൊരു ട്രാക്ക് മോഡുമായി വരുന്നു. മോട്ടോർസൈക്കിളിൽ സെൽഫ് ക്യാൻസലിങ് ടേൺ ഇൻഡിക്കേറ്ററുകൾ, റൈഡ്-ബൈ-വയർ, കോർണറിങ് എബിഎസ് എന്നിവ സ്റ്റാൻഡേർഡായി നൽകും. പുതിയ 125 ഡ്യൂക്ക് ഇന്ത്യൻ വിപണിയിൽ അവതരിപ്പിക്കുന്നത് സംബന്ധിച്ച സൂചനകളൊന്നും കെടിഎം നൽകിയിട്ടില്ല. അടുത്ത വർഷമായിരിക്കും ഈ ബൈക്ക് ഇന്ത്യയിലെത്തുന്നത്.
