കോട്ടയം : ലോക്സഭാ തിരഞ്ഞെടുപ്പില് താന് വിജയിച്ചാല് റബ്ബറിന് 250 രൂപയാക്കുമെന്ന് കോട്ടയത്തെ ബിഡിജെഎസ് സ്ഥാനാര്ഥി തുഷാര് വെള്ളാപ്പള്ളി. കേന്ദ്രത്തില് നിന്ന് ഇത് സംബന്ധിച്ച് ഉറപ്പ് ലഭിച്ചു കഴിഞ്ഞെന്നും തുഷാര് പറഞ്ഞു. ബിഡിജെഎസ് സ്ഥാനാര്ഥി പ്രഖ്യാപനത്തിന് ശേഷം മാധ്യമങ്ങളോട് സംസാരിക്കുകയായിരുന്നു തുഷാര്. ‘റബ്ബറിന് 250 രൂപയാക്കിയെടുക്കാന് എനിക്ക് യാതൊരു ബുദ്ധിമുട്ടും ഉണ്ടാകില്ല. കോട്ടയത്ത് നൂറ് ശതമാനം വിജയപ്രതീക്ഷയുണ്ട്. റബ്ബര് കര്ഷകരെ സംബന്ധിച്ചുള്ള എല്ലാ ആശങ്കകളും പ്രധാനമന്ത്രിയുമായി ഞാന് ചര്ച്ച ചെയ്തിട്ടുണ്ട്. ടൂറിസം രംഗത്തും വലിയ മാറ്റങ്ങള് ഉണ്ടാക്കാന് കഴിയും’ തുഷാര് വെള്ളാപ്പള്ളി പറയുന്നു.
റബ്ബറിന് 250 രൂപ ആക്കിയാല് കേരളത്തില് നിന്ന് ബിജെപിക്ക് ഒരു എംപിയെ നല്കാമെന്ന ബിഷപ്പ് പാംപ്ലാനിയിയുടെ പ്രസ്താവന സംബന്ധിച്ച് തുഷാറിന്റെ പ്രതികരണം ഇങ്ങനെയായിരുന്നു,’ആ എംപി ഞാന് ആണല്ലോ ?’. പി.സി ജോര്ജ് കോട്ടയത്ത് പ്രചാരണത്തിന് വരണമോ വേണ്ടയോ എന്ന് തീരുമാനിക്കേണ്ടത് ബിജെപിയാണെന്നും തുഷാര് വെള്ളാപ്പള്ളി പ്രതികരിച്ചു.
