കോട്ടയം: അയല് വീട്ടുകാരായ സ്ത്രീകളെ നോക്കി നഗ്നതാ പ്രദര്ശനം നടത്തിയ 58 കാരന് പോലീസ് കേസെടുത്തപ്പോള് ആത്മഹത്യയ്ക്ക് ശ്രമിച്ചു. നഗ്നതാ പ്രദര്ശനം നടത്തിയതായി വീട്ടുകാര് പരാതി നല്കിയതിനെ തുടര്ന്ന് പോലീസ് സ്റ്റേഷനിലേക്ക് വിളിപ്പിച്ചതിന് പിന്നാലെയാണ് ഇയാള് കൈ ഞരമ്പ് മുറിച്ച് ആത്മഹത്യയ്ക്ക് ശ്രമിച്ചത്. രക്തം വാര്ന്നൊഴുകിയ ഇയാളെ നാട്ടുകാര് കോട്ടയം മെഡിക്കല് കോളജ് ആശുപത്രിയിലെത്തിച്ചു. കഴിഞ്ഞ ദിവസം വൈകിട്ട് കോട്ടയം കോതനല്ലൂരിലാണ് സംഭവം നടന്നത്.
സ്ത്രീകള് മാത്രം താമസിക്കുന്ന വീട്ടിലേക്ക് നോക്കി നഗ്നതാ പ്രദര്ശനവും അസഭ്യവര്ഷം ചൊരിയലും ഇയാള് പതിവാക്കിയിരുന്നതായാണ് പരാതി. കഴിഞ്ഞ ദിവസവും രാവിലെ പതിവുപോലെ ഇത് അരങ്ങേറിയപ്പോള് സ്ത്രീകള് തന്നെ ഇത് മൊബൈല് ഫോണില് ഷൂട്ട് ചെയ്തു. തുടര്ന്ന് കടുത്തുരുത്തി പോലീസില് പരാതി നല്കി. റെക്കോര്ഡ് ചെയ്ത വീഡിയോ ഉള്പ്പെടെ തെളിവായി പരാതിക്കൊപ്പം നല്കി.
പരാതിയുടെ അടിസ്ഥാനത്തില് പോലീസ് ഇയാളോട് സ്റ്റേഷനില് എത്താന് ആവശ്യപ്പെട്ടു. ഇതിന് പിന്നാലെ ഇയാള് വിഷം കഴിക്കുകയും പരാതിക്കാരിയുടെ വീട്ടില് ചെന്ന് കൈഞരമ്പ് മുറിക്കുകയുമായിരുന്നു. താമസിയാതെ ഇയാള് ബോധ രഹിതനാവുകയും ചെയ്തു. രക്തം വാര്ന്ന് അവശ നിലയിലായ ഇയാളെ കോട്ടയം മെഡിക്കല് കോളജ് ആശുപത്രിയിലെ തീവ്ര പരിചരണ വിഭാഗത്തില് പ്രവേശിപ്പിച്ചു. ഇയാള്ക്കെതിരെ പോലീസ് കേസെടുത്തിട്ടുണ്ട്.
