കോഴിക്കോട് : നിയമസഭാ തെരഞ്ഞെടുപ്പില്‍ പിന്തുണ അഭ്യര്‍ത്ഥിച്ച് കോണ്‍ഗ്രസ് നേതാക്കള്‍ കാന്തപുരം അബൂബക്കര്‍ മുസ്ലിയാരുമായി ചര്‍ച്ച നടത്തി. കേരളത്തിന്റെ ചുമതലയുള്ള എഐസിസി ജനറല്‍ സെക്രട്ടറി താരിഖ് അന്‍വറിന്റെ നേതൃത്വത്തിലാണ് കോണ്‍ഗ്രസ് നേതാക്കള്‍ മര്‍കസിലെത്തി ചര്‍ച്ച നടത്തിയത്.
എ.ഐ.സി.സി അംഗം പി.വി.മോഹനന്‍, ടി.സിദ്ദീഖ്, കെ.പി.അനില്‍ കുമാര് തുടങ്ങിയ നേതാക്കളും ഉണ്ടായിരുന്നു. തെരഞ്ഞെടുപ്പില്‍ പിന്തുണ തന്നെയാണ് മുഖ്യ ചര്‍ച്ചാ വിഷയമെന്ന്‌ കോണ്‍ഗ്രസ് വൃത്തങ്ങള്‍ അറിയിച്ചു.
പാര്‍ലമെന്റില്‍ മാത്രം ശ്രദ്ധ കേന്ദ്രീകരിച്ചാല്‍ പോര. പ്രാദേശിക വിഷയങ്ങളില്‍ കൂടി സജീവമായി ഇടപെടുന്ന രീതിയിലേക്ക് കോണ്‍ഗ്രസിന്റെ പ്രവര്‍ത്തന ശൈലി മാറണമെന്ന് കാന്തപുരം നേതാക്കളോട് നിര്‍ദേശിച്ചു. മതേതരത്വം ശക്തിപ്പെടുത്താനുള്ള ശ്രമങ്ങളില്‍ നിന്ന് കോണ്‍ഗ്രസ് പുറകോട്ടുപോകുന്നതായി ചില സംശയങ്ങളുണ്ട്. ഇക്കാര്യത്തിലും ഉചിതമായ നടപടികള്‍ വേണമെന്നും എല്ലാവരുടേയും വിശ്വാസം ആര്‍ജിക്കാന്‍ കോണ്‍ഗ്രസിനാകണമെന്നും കാന്തുപരം എപി അബൂബക്കര്‍ മുസ്ല്യാര്‍ നിര്‍ദേശിച്ചു.
