ന്യൂഡല്ഹി: ഫലപ്രദമല്ലെന്ന് കണ്ടെത്തിയതിനെ തുടര്ന്ന് കോവിഡ് ചികിത്സാ മാര്ഗ്ഗരേഖകളില് നിന്ന് പ്ലാസ്മ തെറാപ്പി ഒഴിവാക്കി. കോവിഡ് ബാധയ്ക്ക് പ്ലാസ്മ തെറാപ്പി ഫലപ്രദമല്ലെന്ന് ഐസിഎംആര് ആണ് അറിയിച്ചത്. തുടര്ന്ന് മാര്ഗ്ഗരേഖകളില് നിന്നുള്പ്പെടെ പ്ലാസ്മ തെറാപ്പി നീക്കം ചെയ്തു. പ്ലാസ്മ ദാനം ചെയ്യാന് ആവശ്യപ്പെട്ടുകൊണ്ടുള്ള വലിയ ക്യാമ്പയിനുകള് രാജ്യത്ത് നടന്നിരുന്നു. സംവിധായകന് എസ് എസ് രാജമൗലി ഉള്പ്പെടെ നിരവധിപേര് പ്ലാസ്മ ദാനം ചെയ്ത് മുന്നോട്ട് വരികയും ചെയ്തിരുന്നു.
നേരത്തെ ലോകാരോഗ്യ സംഘടനയും പ്ലാസ്മ തെറാപ്പിയില് ആശങ്ക അറിയിച്ചിരുന്നു. ഗുരുതരമായവരുടെ ആരോഗ്യനില വഷളാവാതിരിക്കാനോ കോവിഡ് ബാധിതരെ മരണത്തില് നിന്ന് രക്ഷപെടുത്താനോ പ്ലാസ്മ തെറാപ്പി സഹായിക്കുന്നില്ലെന്നാണ് ഐസിഎംആര് കണ്ടെത്തിയിരിക്കുന്നത്. മുമ്പ് തന്നെ പ്ലാസ്മ തെറാപ്പി ഫലപ്രദമല്ലെന്ന് പല ഡോക്ടര്മാരും അഭിപ്രായപ്പെട്ടിരുന്നു.