കൊച്ചി : കെ-റെയില് സില്വര് ലൈന് പദ്ധതി ലാഭകരമാക്കാന് പത്തനംതിട്ട, എറണാകുളം, തൃശൂര്, പാലക്കാട്, മലപ്പുറം, കോഴിക്കോട്, ജില്ലകളിലെ 10757 ഹെക്ടര് വനവും കണ്ണൂര്, കാസര്കോട് ജില്ലകളിലെ 1227.11 ഹെക്ടര് റവന്യൂ ഭൂമിയും ടൗണ്ഷിപ്പാക്കാന് നിര്ദേശം. പത്തനംതിട്ട കൊടുമണ്ണില് 2866.69 ഹെക്ടര്, തണ്ണിത്തോട്ടില് 699 ഹെക്ടര്, എറണാകുളം, തൃശൂര് ജില്ലകളിലായി കിടക്കുന്ന കാലടി ഗ്രൂപ്പില്നിന്ന് 3776.50 ഹെക്ടര്, നിലമ്പൂരില് 435.9 ഹെക്ടര്, മണ്ണാര്കാട് സൈലന്റ്വാലി ഉള്പ്പെടുന്ന മേഖലയില് 435.94 ഹെക്ടര്, കോഴിക്കോട് പേരാമ്പ്രയില് 943 ഹെക്ടര് എന്നിങ്ങനെയാണ് വനം വകുപ്പില്നിന്ന് ഏറ്റെടുക്കുക. കണ്ണൂര്, കാസര്കോട് ജില്ലകളിലായി കിടക്കുന്ന ചീമേനി ഭാഗത്ത് 1227 ഹെക്ടര് റവന്യൂ വകുപ്പില്നിന്ന് ഏറ്റെടുക്കാനും നിര്ദേശമുണ്ട്.
സ്മാര്ട്ട് സിറ്റി പോലുള്ള സംരംഭങ്ങള് തുടങ്ങുന്നതിനും ടൗണ്ഷിപ്പുകള് സ്ഥാപിക്കുന്നതിനുമാണ് ഈ നടപടിയെന്ന് കേരള റെയില് ഡെവലപ്മെന്റ് കോര്പറേഷന് ലിമിറ്റഡ് എം.ഡി വി.അജിത് കുമാര് സംസ്ഥാന ഗതാഗത വകുപ്പ് പ്രിന്സിപ്പല് സെക്രട്ടറിക്ക് 2019 മേയ് 20ന് അയച്ച കത്തില് (069/കെ.ആര്.ഡി.സി.എല്/2017) വ്യക്തമാക്കിയിട്ടുണ്ട് സില്വര്ലൈനില്നിന്ന് ഈ സ്ഥലങ്ങളിലേക്കും കാസര്കോട്ട് സ്വന്തമായുള്ള 2065 ഹെക്ടര് സ്ഥലത്തേക്കും അതിവേഗ റോഡ് ഗതാഗത സൗകര്യം സ്ഥാപിക്കുമെന്നും ഇങ്ങനെ വികസിപ്പിച്ചെടുക്കുന്ന എട്ട് വനപ്രദേശങ്ങളുടെ ചുറ്റുവട്ടത്തും വന്തോതില് സ്വകാര്യ റിയല് എസ്റ്റേറ്റ് നിക്ഷേപവും അതുവഴി അനുബന്ധ വികസനവും കൊണ്ടുവരാമെന്നും കെ-റെയില് എങ്ങനെ നടപ്പാക്കാമെന്ന് പഠനം നടത്തിയ ഫ്രഞ്ച് കമ്പനി സിസ്ട്ര നല്കിയ റിപ്പോര്ട്ടിന്റെ 49 ാം പേജില് വ്യക്തമാക്കിയിട്ടുണ്ട്.
2019 മേയില്തന്നെ സംസ്ഥാന സര്ക്കാര് കെ-റെയില് സംബന്ധിച്ച സിസ്ട്രയുടെ റിപ്പോര്ട്ട് അംഗീകരിച്ചിരുന്നു. അന്ന് വനംവകുപ്പ് ഭരിച്ചിരുന്നത് സി.പി.ഐ മന്ത്രിയായിരുന്നു. എന്നാല്, ഒരുതരം എതിര്പ്പും ആരും അന്ന് ഉയര്ത്തിയിരുന്നില്ല. ബഹുരാഷ്ട്ര കമ്പനികളുടെയും വന്കിട റിയല് എസ്റ്റേറ്റ് നിക്ഷേപകരുടെയും താല്പര്യ സംരക്ഷണവും കെ-റെയില് വഴി നടപ്പാകുo.