കൊച്ചി : നടിയെ ആക്രമിച്ച കേസിലെ തുടരന്വേഷണ പുരോഗതി റിപ്പോര്ട്ട് അന്വേഷണ സംഘം വിചാരണ കോടതിയില് സമര്പ്പിച്ചു. കേസ് ഈ മാസം 21 ന് പരിഗണിക്കാന് മാറ്റി വെച്ചു. തുടരന്വേഷണത്തിന് കൂടുതല് സമയം, ദിലീപിന്റെ ജാമ്യം റദ്ദാക്കണം എന്നീ ആവശ്യങ്ങള് 21 ന് പരിഗണിക്കും. മാധ്യമങ്ങള്ക്ക് മുന്നില് അന്വേഷണ വിവരം കൈമാറിയെന്ന പരാതിയില് എഡിജിപി എസ്.ശ്രീജിത്ത് വിശദീകരണ റിപ്പോര്ട്ടും കോടതിയില് സമര്പ്പിച്ചു. റിപ്പോര്ട്ടില് കോടതി അതൃപ്തി അറിയിച്ചു.
ക്രൈം ബ്രാഞ്ച് ഡിവൈഎസ്പി ബൈജു പൗലോസ് കഴിഞ്ഞ ദിവസം നല്കിയ റിപ്പോര്ട്ടിന്റെ കോപ്പി-പേസ്റ്റ് ആണിതെന്ന് കോടതി കുറ്റപ്പെടുത്തി. ബൈജു പൗലോസ് നല്കിയ വിശദീകരണം തൃപ്തികരമല്ലെന്ന കോടതി പരാമര്ശത്തെ തുടര്ന്നാണ് അന്വേഷണത്തിന് മേല്നോട്ടം വഹിക്കുന്ന എഡിജിപി എസ്.ശ്രീജിത്ത് ഇന്ന് വിശദീകരണം നല്കിയത്. തുടരന്വേഷണത്തിന് ക്രൈം ബ്രാഞ്ച് നല്കിയ സമയപരിധി അവസാനിച്ചെങ്കിലും അന്വേഷണം അവസാനിച്ചിട്ടില്ല.