ന്യൂഡല്ഹി : പാകിസ്താന് വേണ്ടി ചാരവൃത്തി നടത്തിയ വ്യോമ സേനാ സൈനികനെ ക്രൈംബ്രാഞ്ച് അറസ്റ്റ് ചെയ്തു. തന്ത്രപ്രധാന വ്യോമസേനാ വിവരങ്ങള് പാകിസ്താന് ചോര്ത്തി നല്കിയ ദേവേന്ദ്ര ശര്മ്മയെയാണ് ഡല്ഹി ക്രൈംബ്രാഞ്ച് പിടികൂടിയത്. ദേവേന്ദ്ര ശര്മ്മയുടെ സംശയാസ്പദമായ ബാങ്ക് രേഖകളും കണ്ടെത്തിയിട്ടുണ്ട്. ഐ.എസ്.ഐ എന്ന പാക് ചാര സംഘടന വ്യോമസേനാ ഉദ്യോഗസ്ഥനെ ഹണി ട്രാപ്പില്പ്പെടുത്തി വിവരങ്ങള് ചോര്ത്തുകയായിരുന്നുവെന്നാണ് ക്രൈംബ്രാഞ്ച് വ്യക്തമാക്കുന്നത്.
ഡല്ഹിയില് വെച്ചാണ് ഇയാളെ അന്വേഷണ സംഘം പിടികൂടിയത്. ശര്മ്മയുടെ ഭാര്യയുടെ ബാങ്ക് അക്കൗണ്ടിലേക്ക് നടന്ന നിരവധി ഇടപാടുകളില് അന്വേഷണ സംഘത്തിന് സംശയമുണ്ട്. എന്തൊക്കെ വിവരങ്ങളാണ് ചോര്ന്നിട്ടുള്ളതെന്ന കാര്യം പരിശോധിച്ചു വരികയാണ്. വ്യോമസേനയുടെ നീക്കങ്ങളുമായി ബന്ധപ്പെട്ട വിവരങ്ങളോ, ആയുധങ്ങളെ സംബന്ധിച്ച വിവരങ്ങളോ ചോര്ന്നിട്ടുണ്ടോയെന്നും അന്വേഷണം സംഘം പരിശോധിക്കുന്നുണ്ട്.