ന്യൂഡല്ഹി : വിമാനത്തില് കയറാന് അനുമതി നിഷേധിച്ചതിനെത്തുടര്ന്നു യാത്രക്കാരി വിമാനത്താവളത്തില് തളര്ന്നു വീണു. യാത്രക്കാരിക്ക് എയര് ഇന്ത്യ അടിയന്തര മെഡിക്കല് സഹായം എത്തിച്ചില്ലെന്നാരോപിച്ചു യാത്രക്കാരിയുടെ ബന്ധുക്കളും രംഗത്തെത്തി. ഡല്ഹി വിമാനത്താവളത്തില് ഒരു സഹയാത്രികന് മൊബൈല് ചിത്രീകരിച്ച വീഡിയോയും പുറത്തുവന്നു. ഇതില് മധ്യവയസ്കയായ യാത്രക്കാരി വിമാനത്താവളത്തിന്റെ ബോര്ഡിംഗ് ഗേറ്റിനു സമീപം തറയില് കിടക്കുന്നതും ശ്വാസമെടുക്കാന് വിഷമിക്കുന്നതും കാണാം.
അതേസമയം, യാത്രക്കാരിക്കു അടിയന്തരസഹായം നല്കിയില്ലെന്ന ആരോപണം എയര് ഇന്ത്യ നിഷേധിച്ചു. ഡോക്ടറെയും ഒരു സിഐഎസ്എഫ് ഉദ്യോഗസ്ഥനെയും ഉടന് വിളിച്ചതായും അവര് പറഞ്ഞു. സ്ത്രീയുടെ അനന്തരവന് ഇന്സ്റ്റഗ്രാമില് ഇട്ട പോസ്റ്റില് അവര്ക്കു പ്രമേഹവും ഹൃദ്രോഗവുമുള്ളതായും വേഗത്തില് നടക്കാന് ബുദ്ധിമുട്ടുള്ളതിനാല് അഞ്ചു മിനിറ്റ് വൈകുമെന്ന് അധികൃതരെ അറിയിച്ചിരുന്നതായും പറയുന്നു. എന്നാല്, യാത്രക്കാരി എത്തുംമുന്പേ ഗേറ്റ് അടച്ചെന്നും എന്നിട്ടും അരമണിക്കൂറിനുശേഷവും വിമാനം പറന്നിട്ടില്ലായിരുന്നെന്നും അദ്ദേഹം ആരോപിച്ചു.
യാത്രക്കാരുടെ സുരക്ഷയ്ക്കും സൗകര്യത്തിനും എല്ലായ്പ്പോഴും മുന്തൂക്കം നല്കുന്നുണ്ടെന്നു എയര് ഇന്ത്യ അധികൃതര് പറഞ്ഞു. എന്നിരുന്നാലും, ഉത്തരവാദിത്തമുള്ള ഒരു എയര്ലൈന് എന്ന നിലയില്, റെഗുലേറ്ററി അധികാരികള് നിശ്ചയിച്ചിട്ടുള്ള നിയമങ്ങള് പാലിക്കേണ്ടതുണ്ട്. മറ്റെല്ലാ യാത്രക്കാരും കൃത്യസമയത്തു കയറിയപ്പോള് ഫ്ലൈറ്റ് വൈകിക്കാന് കഴിയില്ലായിരുന്നെന്നും അവര് കൂട്ടിച്ചേര്ത്തു.
