കോഴിക്കോട് : ഏറെ വിവാദങ്ങള്‍ക്കൊടുവില്‍ കോടഞ്ചേരിയില്‍ മിശ്രവിവാഹിതരായ ജോയ് സനയും ഷെജിനും സ്പെഷ്യല്‍ മാര്യേജ് ആക്റ്റ് പ്രകാരം വിവാഹം രജിസ്റ്റര്‍ ചെയ്തു. ഡിവൈഎഫ്‌ഐ സംസ്ഥാന കമ്മിറ്റി അംഗം ദിപു പ്രേംനാഥ്, സിപിഐഎം നേതാക്കള്‍ എന്നിവരുടെ സാന്നിദ്ധ്യത്തില്‍ കോടഞ്ചേരി സബ് രജിസ്ട്രാര്‍ ഓഫീസിലാണ് ഇരുവരും വിവാഹം രജിസ്റ്റര്‍ ചെയ്തത്.
രണ്ട് മതവിഭാഗങ്ങളില്‍ പെട്ട ഇരുവരും ഒരുമിച്ച്‌ ജീവിക്കാന്‍ തീരുമാനിച്ചതിരെ ലൗജിഹാദെന്ന ആരോപണം ഉയര്‍ത്തി സിപിഐഎം ജില്ല സെക്രട്ടേറിയേറ്റ് അംഗം ജോര്‍ജ് എം.തോമസ് തന്നെ രംഗത്തെത്തിയത് ഏറെ വിവാദമായിരുന്നു. ഡിവൈഎഫ്‌ഐ നേതാവായ ഷെജിനൊപ്പം ജീവിക്കാനാണ് താത്പര്യമെന്ന് നിലപാടറിയിച്ചതോടെ, ജോയ് സനയുടെ പിതാവ് നല്‍കിയ ഹേബിയസ് കോര്‍പസ് ഹ‍ര്‍ജി കഴിഞ്ഞമാസം ഹൈക്കോടതി തീര്‍പ്പാക്കിയിരുന്നു. വിവാദങ്ങള്‍ അവസാനിപ്പിക്കണമെന്നും മാതാപിതാക്കളെ പിന്നീട് പോയി കാണുമെന്നും ജോയ്സനയും ഷെജിനും പ്രതികരിച്ചു.
