ബംഗളൂരു: ഇന്ത്യന്‍ വനിതാ ക്രിക്കറ്റ് താരം കരുണാ ജെയ്ന്‍ വിരമിച്ചു. എല്ലാ ഫോര്‍മാറ്റില്‍ നിന്നുമാണ് 36ാം വയസില്‍ താരത്തിന്റെ വിരമിക്കല്‍ പ്രഖ്യാപനം.5 ടെസ്റ്റും 44 ഏകദിനവും 9 ട്വന്റി20യും കരുണാ ജെയ്ന്‍ ഇന്ത്യക്കായി കളിച്ചു. 2005ലെ ഏകദിന ലോകകപ്പില്‍ ഇന്ത്യന്‍ ടീമിലെ പ്രധാന താരങ്ങളില്‍ ഒരാളായിരുന്നു കരുണ. 2005 മുതല്‍ 2014 വരെയാണ് കരുണ ഇന്ത്യന്‍ ടീമിന്റെ ഭാഗമായിരുന്നത്. അവിശ്വസനീയമായ യാത്രയായിരുന്നു കരിയറിലേത്.
ഉയര്‍ച്ചകളിലും താഴ്ചകളിലും ഏവരുടേയും പിന്തുണ ഇല്ലായിരുന്നു എങ്കില്‍ അത് സാധ്യമാവുമായിരുന്നില്ല. ക്രിക്കറ്റ് താരമായ സഹോദരന്‍ ഞാന്‍ ഗ്രൗണ്ടിലിറങ്ങുമ്ബോഴെല്ലാം എനിക്ക് കരുത്ത് നല്‍കി. ക്രിക്കറ്റിന് തുടര്‍ന്നും എന്റെ സംഭാവനകള്‍ നല്‍കും. എന്റെ ക്രിക്കറ്റ് യാത്രയുടെ ഭാഗമായ എല്ലാവര്‍ക്കും നന്ദി, കരുണ പറഞ്ഞു. 44 ഏകദിനത്തില്‍ നിന്ന് 987 റണ്‍സ് ആണ് താരം നേടിയത്. ഒരു സെഞ്ചുറിയും എട്ട് അര്‍ധ ശതകവും ഇതില്‍ ഉള്‍പ്പെടുന്നു. എയര്‍ ഇന്ത്യ, കര്‍ണാടക, പോണ്ടിച്ചേരി ടീമുകള്‍ക്കായും കരുണ കളിച്ചു.
