കണ്ണൂര്: അന്തരിച്ച സിപിഎം മുന് സംസ്ഥാന സെക്രട്ടറി കോടിയേരി ബാലകൃഷ്ണന്റെ വീട് മുന് മുഖ്യമന്ത്രി ഉമ്മന്ചാണ്ടി സന്ദര്ശിച്ചു. കോടിയേരിയുടെ ഭാര്യ വിനോദിനി, മക്കളായ ബിനോയ്, ബിനീഷ് എന്നിവരോട് ഉമ്മന്ചാണ്ടി വിവരങ്ങള് ചോദിച്ചറിഞ്ഞു. ശനിയാഴ്ച ഉച്ചയ്ക്ക് 12 മണിയോടെയാണ് മുന് മന്ത്രി കെ.സി.ജോസഫ്, കെഎസ്യു സംസ്ഥാന പ്രസിഡന്റ് കെ.എം. അഭിജിത് എന്നിവര്ക്കൊപ്പം കോടിയേരി മുളിയില്നടയിലെ വീട്ടില് ഉമ്മന്ചാണ്ടി എത്തിയത്. സ്പീക്കര് എ.എന്. ഷംസീറും അവിടെയുണ്ടായിരുന്നു.
രാഷ്ട്രീയമായി വിരുദ്ധ ചേരിയില് നിന്നപ്പോഴും കോടിയേരി ബാലകൃഷ്ണനുമായി വ്യക്തിപരമായ അടുപ്പം കാത്തു സൂക്ഷിച്ചിരുന്നുവെന്ന് ഉമ്മന്ചാണ്ടി പറഞ്ഞു. കലാലയ രാഷ്ട്രീയത്തിലൂടെ പടിപടിയായി ഉയര്ന്ന് സിപിഎമ്മിന്റെ ഏറ്റവും ഉന്നതപദവിയിലെത്തുകയും എംഎല്എ, മന്ത്രി തുടങ്ങിയ പദവികളിലിരുന്ന് മികച്ച പ്രകടനം നടത്തുകയും ചെയ്ത കോടിയേരി ഏറെ ജനകീയനായിരുന്നുവെന്നും അദ്ദേഹം പറഞ്ഞു.