മലപ്പുറം: പി.എം.എ സലാം മുസ്ലിം ലീഗ് സംസ്ഥാന ജനറല്‍ സെക്രട്ടറിയായി തുടരും. മുസ്ലിം ലീഗ് സംസ്ഥാന പ്രസിഡന്റായി സാദിഖ് അലി തങ്ങളും ട്രഷററായി സി ടി അഹമ്മദ് അലിയും തുടരാന്‍ ധാരണയായി. കോഴിക്കോട് ചേര്‍ന്ന സംസ്ഥാന കൗണ്‍സിലിലാണ് ഇത് സംബന്ധിച്ച തീരുമാനമായത്. നേരത്തേ എം.കെ മുനീര്‍ എംഎല്‍എ സെക്രട്ടറിയാകുമെന്ന് സൂചനകളുണ്ടായിരുന്നെങ്കിലും പിഎംഎ സലാമിനെ തന്നെ സെക്രട്ടറിയായി ഇന്ന് കോഴിക്കോട് നടന്ന സംസ്ഥാന കൗണ്‍സിലില്‍ തെരഞ്ഞെടുക്കുകയായിരുന്നു.
മുസ്ലിം ലീഗില്‍ സംസ്ഥാന സെക്രട്ടറി സ്ഥാനത്തിനായി തര്‍ക്കം രൂക്ഷമായിരുന്നു. പി എം എ സലാമും എം കെ മുനീറും തങ്ങള്‍ക്ക് ഭൂരിപക്ഷ പിന്തുണ ഉണ്ട് എന്ന് അവകാശപ്പെട്ട് രംഗത്തെത്തിയിരുന്നു. പി കെ കുഞ്ഞാലിക്കുട്ടി അടക്കമുള്ളവര്‍ക്ക് പി എം എ സലാം വരുന്നതിനോട് ആണ് താല്‍പര്യം പ്രകടിപ്പിച്ചത്. എന്നാല്‍ കെ എം ഷാജി, പി എം സാദിഖലി തുടങ്ങിയ നേതാക്കളാണ് എം കെ മുനീറിന്റെ പക്ഷത്തുണ്ടായിരുന്നത്.
