ശബരിമല: ദർശനത്തിനു ബുക്ക് ചെയ്യുന്നതിനൊപ്പം വെർച്വൽ ക്യു വഴി വഴിപാടുകളും ബുക്ക് ചെയ്യാനുള്ള അവസരം ഒരുക്കുന്നതിനുള്ള നടപടികൾ ദേവസ്വം ബോർഡ് തുടങ്ങി. മാസപൂജ ഉൾപ്പെടെ ശബരിമലയിൽ ദർശനത്തിനു വെർച്വൽ ക്യു പാസ് നിർബന്ധമാക്കിയതിനു പിന്നാലെയാണിത്. പ്രസാദങ്ങളായ അരവണ, അപ്പം, മഞ്ഞൾ, കുങ്കുമം, വിഭൂതി എന്നിവ മാത്രമാണ് ഇപ്പോൾ വെർച്വൽ ക്യു വഴി ബുക്ക് ചെയ്യാനാകൂ.
ദേവസ്വം ബോർഡിന്റെ onlinetdb.com എന്ന വെബ്സൈറ്റ് വഴിയാണ് നിലവിൽ വഴിപാടുകൾ ബുക്ക് ചെയ്യാൻ കഴിയുന്നത്. സന്നിധാനത്ത് താമസിക്കാനുള്ള മുറികൾ ബുക്ക് ചെയ്യുന്നതും ഇങ്ങനെയാണ്. എന്നാൽ മിക്കപ്പോഴും സൈറ്റ് കിട്ടാറില്ല. അതിനാൽ സന്നിധാനത്ത് എത്തിയ ശേഷമാണ് തീർഥാടകർ ഇപ്പോൾ വഴിപാടുകളും മുറികളും ബുക്ക് ചെയ്യുന്നത്. ഇവ വെർച്വൽ ക്യു വഴിയാക്കിയാൽ തടസ്സമില്ലാതെ ബുക്കിങ് നടത്താനാകുമെന്നാണ് പ്രതീക്ഷ.