ദില്ലി: സംസ്ഥാനത്ത് ജാതി അടിസ്ഥാനമാക്കിയുള്ള സെന്‍സസ് നടത്താനുള്ള ബീഹാര്‍ സര്‍ക്കാരിന് തിരിച്ചടി. നിതീഷ് കുമാര്‍ സര്‍ക്കാര്‍ ആരംഭിച്ച ജാതി സര്‍വെയ്ക്ക് സ്റ്റേ. പാറ്റ്‌ന ഹൈക്കോടതിയാണ് സംസ്ഥാനത്തെ ജാതി സര്‍വെയ്ക്ക് സ്റ്റേ ഏര്‍പ്പെടുത്തിയത്. ബീഹാറിലെ ജാതി സര്‍വെ ജാതി സെന്‍സസിന് സമാനമാണെന്ന് വിലയിരുത്തിയ പാറ്റ്‌ന ഹൈക്കോടതി, സെന്‍സസ് നടത്താന്‍ കേന്ദ്രത്തിന് മാത്രമേ അവകാശമുള്ളൂവെന്നും ഉത്തരവില്‍ വ്യക്തമാക്കി. കഴിഞ്ഞ ജനുവരി ഏഴിനാണ് ബിഹാറില്‍ സംസ്ഥാന സര്‍ക്കാര്‍ ജാതി സര്‍വെ തുടങ്ങിയത്.
യൂത്ത് ഫോര്‍ ഇക്വാലിറ്റി എന്ന സംഘടന നല്‍കിയ ഹര്‍ജി ഉള്‍പ്പെടെ മൂന്ന് ഹര്‍ജികള്‍ പരിഗണിച്ചാണ് ചീഫ് ജസ്റ്റിസ് കെ.വിനോദ് ചന്ദ്രന്‍, ജസ്റ്റിസ് മധുരേഷ് പ്രസാദ് എന്നിവരുടെ ബെഞ്ച് ഇന്ന് വിധി പറഞ്ഞത്. കേസ് അടുത്ത ജൂലായ് മൂന്നിന് പരിഗണിക്കും. ജാതി അടിസ്ഥാനമാക്കിയുള്ള സര്‍വേ സംസ്ഥാന സര്‍ക്കാരിന് നടത്താന്‍ അധികാരമില്ലാത്ത സെന്‍സസ് ആണെന്ന് കോടതി പ്രഥമദൃഷ്ട്യാ പറഞ്ഞു.
