തിരുവനന്തപുരം: ട്രെയിന്‍ യാത്രക്കാര്‍ക്ക് ആശ്വാസമായി കുറഞ്ഞ നിരക്കില്‍ ഭക്ഷണം ലഭ്യമാക്കാന്‍ റെയില്‍വേ. ജനറല്‍ കംപാര്‍ട്ട്‌മെന്റില്‍ യാത്ര ചെയ്യുന്നവര്‍ക്കായാണ് കുറഞ്ഞ നിരക്കില്‍ പ്ലാറ്റ്‌ഫോമുകളില്‍ ഐആര്‍സിടിസി പ്രത്യേക കൗണ്ടറുകള്‍ തുറക്കുന്നത്. തിരുവനന്തപുരം ഉള്‍പ്പടെ രാജ്യത്തെ 64 സ്റ്റേഷനുകളിലാണ് പുതിയ ഭക്ഷണ കൗണ്ടറുകള്‍ തുറക്കുന്നത്.
കുറഞ്ഞ പൈസയ്ക്ക് ഭക്ഷണവും വെള്ളവും ലഭ്യമാക്കുകയെന്ന ലക്ഷ്യത്തോടെയാണ് കൗണ്ടറുകള്‍ തുറക്കുന്നത്. 20 രൂപയ്ക്കു പൂരി-ബജി-അച്ചാര്‍ കിറ്റ് ലഭിക്കും. മൂന്ന് രൂപയ്ക്ക് 200 മില്ലി ലിറ്റര്‍ വെള്ളവും ലഭിക്കും. കൂടാതെ 50 രൂപയ്ക്ക് സ്‌നാക് മീലും ഐആര്‍സിടിസിയുടെ പ്രത്യേക കൗണ്ടറുകളില്‍ ലഭിക്കും. സ്‌നാക് മീലില്‍ ഊണ്, ചോലെ-ബട്ടൂര, പാവ് ബജി, മസാലദോശ തുടങ്ങിയവയില്‍ ഏതെങ്കിലുമായിരിക്കും ലഭിക്കുക. തിരുവനന്തപുരം ഡിവിഷനില്‍ തിരുവനന്തപുരം സെന്‍ട്രല്‍ കൂടാതെ നാഗര്‍കോവിലിലും പാലക്കാട് ഡിവിഷനില്‍ മംഗളൂരു ജങ്ഷനിലും ഐആര്‍സിടിസിയുടെ പ്രത്യേക ഭക്ഷണ കൗണ്ടറുകളുണ്ടാകും. വിജയകരമാണെങ്കില്‍ ഘട്ടം ഘട്ടമായി രാജ്യത്തെ എല്ലാ സ്റ്റേഷനുകളിലും നടപ്പാക്കും.
