മുംബൈ: മകനെ കഴുത്ത് ഞെരിച്ച് കൊന്ന ശേഷം പിതാവ് ആത്മഹത്യയ്ക്ക് ശ്രമിച്ചു. മഹാരാഷ്ട്രയിലെ ചന്ദ്രാപൂരിലാണ് സംഭവം. മൂന്ന് വയസ്സുകാരനായ മകനെ കൊലപ്പെടുത്തിയ ശേഷം പിതാവ് സ്വയം കത്തി ഉപയോഗിച്ച് കഴുത്ത് മുറിയ്ക്കുകയായിരുന്നു. വിവരം അറിഞ്ഞ് പോലീസ് സ്ഥലത്തെത്തി ഇയാളെ ആശുപത്രിയില് പ്രവേശിപ്പിച്ചു. ഭാര്യ വീടുവിട്ടിറങ്ങിയതിനെ തുടര്ന്നുള്ള മാനസിക സമ്മര്ദ്ദത്തിലാണ് ഈ ക്രൂരമായ നടപടിയെന്ന് പോലീസ് പറഞ്ഞു. സംഭവത്തില് അന്വേഷണം ആരംഭിച്ചതായി ചന്ദ്രപൂര് എസ്പി രവീന്ദ്ര സിംഗ് പര്ദേശി പറഞ്ഞു.
ഗണേഷ് വിത്തല് ചൗധരിയും ഭാര്യ കാജലും മൂന്ന് വയസ്സുള്ള മകനും ഒപ്പം മഹാരാഷ്ട്രയിലെ ചന്ദ്രാപൂരിലാണ് താമസിച്ചിരുന്നത്. ഗണേഷ് മയക്കുമരുന്നിന് അടിമയായിരുന്നു. മദ്യപിക്കരുതെന്നും മയക്കുമരുന്ന് ഉപയോഗിക്കരുതെന്നും കാജല് നിരന്തരം പറയുമായിരുന്നു. എന്നാല് മയക്കുമരുന്നില് നിന്നും പിന്തിരിഞ്ഞെങ്കിലും മദ്യപാനം ഉപേക്ഷിച്ചില്ല. ഹനുമാന് ജയന്തി ദിനത്തില് പ്രാര്ത്ഥനാ സമയത്ത് മദ്യപിച്ചെത്തി ഗണേഷ് വീട്ടില് പ്രശ്നങ്ങളുണ്ടാക്കി. ഇത് ചോദ്യം ചെയ്ത കാജലിനെ ഗണേഷ് ഒരുപാട് തല്ലി. തുടര്ന്ന് കാജല് വീടുവിട്ട് ഇറങ്ങുകയായിരുന്നു.
