കൊച്ചി: കേരളത്തില് സമുദ്രമത്സ്യബന്ധനത്തിന് പോകുന്നവരില് 58 ശതമാനവും അന്യസംസ്ഥാന തൊഴിലാളികളെന്ന് പഠനം. മീന്പിടുത്തം, വിപണനം, സംസ്കരണം എന്നീ രംഗങ്ങളില് കേന്ദ്ര സമുദ്രമത്സ്യ ഗവേഷണ സ്ഥാപനം (സിഎംഎഫ്ആര്ഐ) നടത്തിയ ഗവേഷണത്തില് അന്യസംസ്ഥാന തൊഴിലാളികള് സംസ്ഥാനത്തെ സമുദ്രമത്സ്യ മേഖലയില് സുപ്രധാന പങ്കുവഹിക്കുന്നതായി കണ്ടെത്തി. ഇന്ത്യന് സമുദ്രമത്സ്യബന്ധന മേഖലയിലെ തൊഴില്, ഉപജീവനമാര്ഗം, വിഭവ ഉല്പ്പാദന രീതികള് എന്നിവയുമായി ബന്ധപ്പെട്ട സിഎംഎഫ്ആര്ഐയുടെ ദേശീയ ഗവേഷണ പദ്ധതിയിലെ കണ്ടെത്തലുകള് സിഎംഎഫ്ആര്ഐയില് നടന്ന ശില്പശാലയില് അവതരിപ്പിച്ചു. തദ്ദേശീയ-അന്യസംസ്ഥാന സംസ്ഥാന മത്സ്യത്തൊഴിലാളികളും പ്രതിനിധികളും ശില്പശാലയില് പങ്കെടുത്തു.
സിഎംഎഫ്ആര്ഐ പ്രിന്സിപ്പല് സയന്റിസ്റ്റ് ഡോ ശ്യാം എസ് സലീമാണ് ഗവേഷണ പദ്ധതിയുടെ പ്രിന്സിപ്പല് ഇന്വസ്റ്റിഗേറ്റര്. കേരളത്തിലെ യന്ത്രവല്കൃത മത്സ്യബന്ധന മേഖലയില് ഏറ്റവും കൂടുതല് അന്യസംസ്ഥാന തൊഴിലാളികള് ഉള്ളത് എറണാകുളം ജില്ലയിലെ മുനമ്പം തുറമുഖത്താണ്. 78 ശതമാനം. പ്രധാനമായും തമിഴ്നാട്, പശ്ചിമ ബംഗാള്, ഒഡീഷ എന്നിവിടങ്ങളില് നിന്നുള്ള തൊഴിലാളികളാണ് മത്സ്യബന്ധന മേഖലയിലുള്ളത്. സംസ്കരണ യൂണിറ്റുകളില് 50 ശതമാനവും വിപണന രംഗത്ത് 40 ശതമാനവും ഇതരസംസ്ഥാന തൊഴിലാളികളാണ്. യുവതലമുറയിലുള്ളവര് സമുദ്രമത്സ്യ മേഖലയില് ഉപജീവനം തേടാന് താല്പര്യപ്പെടുന്നില്ലെന്നും പഠനം വെളിപ്പെടുത്തുന്നു.
