പത്തനംതിട്ട : വരുന്ന നിയമസഭാ തെരഞ്ഞടുപ്പില് ആറന്മുളയില് അബിന് വര്ക്കി യു.ഡി.എഫ് സ്ഥാനാര്ഥിയായി മത്സരിക്കുമെന്ന് ഏറെക്കുറെ ഉറപ്പായി. ആറന്മുളയില് സ്ഥാനാര്ഥിയായി മത്സരിക്കേണ്ടത് അബിന് വര്ക്കിയാണോ അതോ ജില്ലയില് നിന്നുള്ള സ്ഥാനാര്ഥിയാണോ എന്നത് കോണ്ഗ്രസിനുള്ളില് വലിയ ചര്ച്ചാവിഷയമായിരുന്നു. ജില്ലയില് നിന്നുള്ള സ്ഥാനാര്ഥി മാത്രം ആറന്മുളയില് മത്സരിച്ചാല് മതി എന്ന് യു.ഡി.എഫ് ജില്ലാ എക്സിക്യുട്ടീവില് ചര്ച്ചയായിരുന്നു.
ആറന്മുളയില് അബിന് വര്ക്കിയെ പരിഗണിക്കുമെന്ന് ഉറപ്പായതോടെ ഇതിനെതിരെ ജില്ലയുടെ വിവിധ ഭാഗങ്ങളില് പോസ്റ്ററുകള് പ്രത്യക്ഷപ്പെട്ടിരുന്നു. കോണ്ഗ്രസുകാരുടെ ഹൃദയ വികാരത്തെ മുറിവേല്പിക്കരുത് എന്നത് അടക്കമുള്ള വാചകങ്ങള് ആയിരുന്നു മണ്ഡലത്തിന്റെ വിവിധ ഭാഗങ്ങളില് പതിക്കപ്പെട്ട പോസ്റ്ററില് ഉണ്ടായിരുന്നത്. യൂത്ത് കോണ്ഗ്രസ് ദേശീയ സെക്രട്ടറിയും കോണ്ഗ്രസ് നേതാവുമാണ് അബിന് വര്ക്കി കോടിയാട്ട്. മുമ്പ് കെ.എസ്.യു സംസ്ഥാന പ്രസിഡന്റ് പദവിയും വഹിച്ചിട്ടുണ്ട്.
