കോഴിക്കോട് : വെസ്റ്റ്ഹിലിൽ ബസും ബൈക്കും കൂട്ടിയിടിച്ചു ബൈക്ക് യാത്രികന്‍ മരിച്ചു. തലക്കുളത്തൂര്‍ സ്വദേശി മണികണ്ഠന്‍ (19) ആണ് മരിച്ചത്. ബൈക്കില്‍ ഒപ്പമുണ്ടായിരുന്ന പാലേര്‍മല സ്വദേശി നിധിന്റെ നില ഗുരുതരമാണ്. വ്യാഴാഴ്ച്ച രാവിലെ 8.45 ഓടെ വെസ്റ്റ്ഹില്‍സ് സെന്റ് മൈക്കിള്‍സ് സ്‌ക്കൂളിനു മുന്‍വശത്താണ് അപകടം നടന്നത്.
കോഴിക്കോട് നിന്നും കണ്ണൂരിലേക്ക് പോവുകയായിരുന്ന ബസ് നഗരത്തിലേക്ക് വരികയായിരുന്ന ഡ്യൂക്കിന്റെ പുതിയ മോഡല്‍ ബൈക്കുമായിട്ടാണ് കൂട്ടിയിടിച്ചത്. ബസ് അമിതവേഗത്തിലെത്തി മറ്റൊരു വാഹനത്തെ മറികടക്കാന്‍ ശ്രമിക്കുന്നതിനിടെയാണ് ബൈക്കില്‍ ഇടിച്ചത്. ഇടിയില്‍ ബൈക്ക് പൂര്‍ണമായി തകര്‍ന്നു ബസ്സിനുളളിലായി. പരിക്കേറ്റവരെ ഉടന്‍ തന്നെ മെഡിക്കല്‍ കോളേജ് ആശുപത്രിയില്‍ പ്രവേശിപ്പിച്ചുയെങ്കിലും ഒരാള്‍ മരണപ്പെടുകയായിരുന്നു.
