ആറന്മുള : അയൽവാസിയും 72 കാരനുമായ വയോധികനെ കരിങ്കല്ലുകൊണ്ട് തലയ്ക്കും മുഖത്തും ഇടിച്ച് കൊലപ്പെടുത്താൻ ശ്രമിച്ച കേസിലെ പ്രതിയെ ആറന്മുള പോലീസ് അറസ്റ്റ് ചെയ്തു. കോഴഞ്ചേരി മേലുകര പരോലിൽ വീട്ടിൽ മത്തായി മാത്യു (62) ആണ് പിടിയിലായത്. വ്യാഴാഴ്ച ഉച്ചയ്ക്ക് 2.30 നായിരുന്നു കേസിന് ആസ്പദമായ സംഭവം. പ്രതിയുടെ അയൽവാസിയായ 72 കാരനെ പ്രതി വഴക്കിനിടെ കരിങ്കല്ല് കൊണ്ട് ആക്രമിക്കുകയായിരുന്നു.
തലയ്ക്ക് ഗുരുതരമായി പരിക്കേറ്റ വയോധികനെ കോഴഞ്ചേരിയിലെ സ്വകാര്യ ആശുപത്രിയിൽ പ്രവേശിപ്പിച്ചു. രണ്ടുദിവസമായി വെന്റിലേറ്ററിലും ഇപ്പോൾ ഐ.സി.യു.വിലും കഴിയുന്ന ഇദ്ദേഹത്തിന്റെ ആരോഗ്യനില ഇപ്പോഴും ഗുരുതരമായി തുടരുകയാണ്. ആറന്മുള പോലീസ് സബ് ഇൻസ്പെക്ടർ ഉണ്ണികൃഷ്ണൻ ജി., അഖിൽ മുരളി എന്നിവരുടെ നേതൃത്വത്തിലുള്ള പോലീസ് സംഘമാണ് പ്രതിയെ അറസ്റ്റ് ചെയ്തത്. പത്തനംതിട്ട ജുഡീഷ്യൽ ഒന്നാം ക്ലാസ് മജിസ്ട്രേറ്റ് കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു.
