പത്തനംതിട്ട : പ്രായപൂർത്തിയാകാത്ത പെൺകുട്ടിക്കുനേരെ ലൈംഗികമായി അതിക്രമം കാട്ടിയ പ്രതിയ്ക്ക് 7 വർഷം കഠിനതടവും 65000 രൂപ പിഴയും. പത്തനംതിട്ട അഡിഷണൽ ഡിസ്ട്രിക് ആൻഡ് സെഷൻസ് കോടതി ഒന്ന് ( പ്രിൻസിപ്പൽ പോക്സോ കോടതി ), ജഡ്ജി ജയകുമാർ ജോൺ, തണ്ണിത്തോട് തൂമ്പാകുളം തൈപ്പറമ്പിൽ പ്രകാശി (43) നെയാണ് ഇന്ന് ശിക്ഷിച്ചത്. ശിക്ഷ പ്രത്യേകം അനുഭവിക്കണം. പോക്സോ നിയമത്തിലെ വകുപ്പ് 7 പ്രകാരം 4 വർഷവും 40000 രൂപയും ഐ പി സി 457 പ്രകാരം 3 വർഷവും 25000 രൂപയും കഠിന തടവും പിഴയും ശിക്ഷിച്ച് ഉത്തരവായത്. പിഴയടച്ചില്ലെങ്കിൽ 5 മാസം കൂടി കഠിന തടവ് അനുഭവിക്കണമെന്നും കോടതി ഉത്തരവിട്ടു.
പിഴത്തുക ഇരയായ പെൺകുട്ടിക്ക് നൽകണം. ഈവർഷം ജനുവരി ഒന്നിനാണ് സംഭവം. കിടപ്പുമുറിയിൽ ഉറങ്ങിക്കിടന്ന പെൺകുട്ടിയെ വീട്ടിൽ അതിക്രമിച്ചകയറിയ പ്രതി ലൈംഗിക അതിക്രമം കാട്ടിയതിന് തണ്ണിത്തോട് എസ് ഐ ആയിരുന്ന ആർ മനോജ്‌കുമാർ ആണ് കേസ് എടുത്തതും തുടർന്ന് അന്വേഷണം നടത്തി ജനുവരി 27 ന് കുറ്റപത്രം സമർപ്പിച്ചതും. എ എസ് ഐ ദിലീപ്ഖാനും കേസിന്റെ അന്വേഷണത്തിൽ പങ്കെടുത്തു. സംഭവദിവസം തന്നെ പ്രതി അറസ്റ്റിലായിരുന്നു. പ്രോസിക്യൂഷന് വേണ്ടി പോക്സോ സ്പെഷ്യൽ പ്രോസിക്യൂട്ടർ അഡ്വ. ജെയ്‌സൺ മാത്യൂസ് ഹാജരായി.
