തൃശൂര് : നടനും ചിത്രകാരനും മിമിക്രി കലാകാരനുമായ തെരാജ് കുമാര് കോവിഡ് ബാധിച്ചു മരിച്ചു. തൃശൂര് അരിമ്പൂര് കൈപ്പിള്ളി സ്വദേശിയാണ്. കോവിഡ് ബോധവത്കരണത്തിനായി സ്വന്തം വീട്ടില് ആശുപത്രി കിടക്ക സെറ്റിട്ട് ഹ്രസ്വ ചിത്രമെടുത്തതിന് പിന്നാലെയാണ് തെരാജിന് കോവിഡ് ബാധിച്ചത്.
കോവിഡ് നെഗറ്റീവായെങ്കിലും പനിയും ശ്വാസതടസവും ബാധിച്ചിരുന്നു. തൃശൂര് മെഡിക്കല് കോളേജ് ആശുപത്രിയില് ചികിത്സയിലിരിക്കെയാണ് തെരാജ് മരിച്ചത്. കുമ്പസാരം എന്ന പേരിലാണ് കോവിഡ് ബോധവത്കരണത്തിനായി തെരാജ് ഹ്രസ്വചിത്രം സംവിധാനം ചെയ്തത്.ചിത്രത്തിന്റെ രചനയും സംഭാഷണവും നിര്മ്മാണവും തെരാജ് തന്നെയായിരുന്നു.
പശ്ചാത്തല സംഗീതവും അദ്ദേഹം തന്നെ നിര്വ്വഹിച്ചു. തെരാജിന്റെ ഭാര്യ ധന്യയാണ് ചിത്രം മൊബൈല് ഫോണില് ചിത്രീകരിച്ചത്. ഇക്കഴിഞ്ഞ സെപ്റ്റംബറിലാണ് തെരാജിന് കോവിഡ് സ്ഥിരീകരിച്ചത്. വീട്ടില് നിരീക്ഷണത്തില് കഴിഞ്ഞ അദ്ദേഹത്തിന് കോവിഡ് നെഗറ്റീവായെങ്കിലും ഒരാഴ്ചയ്ക്ക് ശേഷം വീണ്ടും പനിയും ശ്വാസതടസവും അനുഭവപ്പെടുകയായിരുന്നു.
