അടൂർ: കേന്ദ്ര സർക്കാരിന്റെ നിയന്ത്രണത്തിലുള്ള ഗ്രാമീൺ ഈ-സ്റ്റോർ അടൂരിൽ പ്രവർത്തനം ആരംഭിച്ചു. കേന്ദ്ര സർക്കാരിന്റെ ഇലക്ട്രോണിക്സ് ആൻഡ് ഐ.ടി മന്ത്രാലയത്തിന്റെ കോമൺ സർവ്വീസ് സെൻ്റർ വഴി നിത്യോപയോഗ സാധനങ്ങൾ വീടുകളിൽ എത്തിച്ചു നൽകുക എന്നതാണ് ഗ്രാമീൺ ഈ-സ്റ്റോർ കൊണ്ട് കേന്ദ്രസർക്കാർ ലക്ഷ്യമിട്ടിരിക്കുന്നത്.
കാലാവസ്ഥ വ്യതിയാനവും മഹാമാരിയും മൂലം ജനങ്ങൾക്ക് പരമാവധി വീടുകളിൽ തന്നെ കഴിയേണ്ട സാഹചര്യത്തിൽ കടകളിലെ നീണ്ട ക്യൂവും കാത്തിരുപ്പും ഒഴിവാക്കി വീടുകളിൽ സുരക്ഷിതമായി സാധനങ്ങൾ എത്തിച്ചു നൽകുക എന്നതാണ് ഈ പദ്ധതിയുടെ ഉദ്ദേശം. ഒപ്പം ചെറുകിട കുടിൽ വ്യവസായങ്ങളിൽ നിർമ്മിക്കുന്ന നിത്യോപയോഗ സാധനങ്ങൾ ഗ്രാമീൺ ഈ-സ്റ്റോർ വഴി വിൽപന നടത്തുന്നതിനും കഴിയും.
മൊബൈൽ ആപ്പിൻ്റെ ഉദ്ഘാടനം ചിറ്റയം ഗോപകുമാർ എം.എൽ.എ നിർവ്വഹിച്ചു. കേന്ദ്ര കോമൺ സർവ്വീസ് സെൻ്റർ ജില്ലാ മാനേജർ റിൻ്റു മാത്യൂവിൽ നിന്നും1000 രൂപ സബ്സിഡി കിറ്റുകൾ റിട്ട.ഡി വൈ എസ് പി ജവഹർ ജനാർഡ് ഏറ്റുവാങ്ങി ആദ്യ വിൽപ്പന ഉദ്ഘാടനം ചെയ്തു.
പ്ലേ സ്റ്റോറിൽ നിന്നും cscgrameene-estore എന്ന മൊബൈൽ ആപ് ഡൗൺലോഡ് ചെയ്ത് സാധനങ്ങൾ വീട്ടിലിരുന്ന് ഓർഡർ ചെയ്യാം. മൊബൈൽ ആപ് ഉപയോഗിക്കാൻ അറിയാത്തവർക്ക് 8304954641 എന്ന വാട്സാപ്പ് നമ്പരിലും ഓർഡർ നൽകാം. അടൂർ ആക്സിസ് ബാങ്കിന് എതിർവശത്തുള്ള കോമൺ സർവ്വീസ് സെന്ററാണ് ഓഫീസ്.