യുപി : കുട്ടികളുമായി യാത്ര ചെയ്ത യുവതി ഓടുന്ന ബസ്സില്‍ പീഡനത്തിന് ഇരയായി. ഉത്തര്‍പ്രദേശിലെ പ്രതാപ്ഘഡില്‍ നിന്ന് നോയിഡയിലേക്കുള്ള യാത്രക്കിടയിലാണ് സംഭവം. ബസ്സിലെ രണ്ട് ഡ്രൈവര്‍മാര്‍ ചേര്‍ന്നാണ് യുവതിയെ ആക്രമിച്ചത്. ലഖ്നൗവിനും മധുരയ്ക്കും ഇടയ്ക്ക് വെച്ചാണ് യുവതി ആക്രമണത്തിന് ഇരയായത്. സംഭവം നടക്കുമ്പോള്‍ പത്തോളം പേര്‍ ബസ്സിലുണ്ടായിരുന്നുവെന്നതാണ് ഞെട്ടിക്കുന്ന മറ്റൊരു വസ്തുത.
നോയിഡയില്‍ എത്തിയ ശേഷം യുവതി നല്‍കിയ പരാതിയില്‍ സെക്ടര്‍ 20 പോലീസ് എഫ്‌ഐആര്‍ രജിസ്റ്റര്‍ ചെയ്തു. പ്രതാപ്ഘഡില്‍ നിന്നും നോയിഡയിലേക്ക് സര്‍വീസ് നടത്തുന്ന ദീര്‍ഘദൂര എസി സ്ലീപ്പര്‍ ബസിലാണ് 25 കാരിയായ യുവതി ആക്രമിക്കപ്പെട്ടത്. ആദ്യമായാണ് യുവതി സ്വന്തം നാടായ പ്രതാപ്ഘഡില്‍ നിന്ന് നോയിഡയിലേക്ക് യാത്ര ചെയ്യുന്നത്. പച്ചക്കറി വ്യാപാരിയാണ് യുവതിയുടെ ഭര്‍ത്താവ്. രാത്രിയിലാണ് ഡ്രൈവര്‍മാര്‍ യുവതിയെ ആക്രമിച്ചത്. അതേസമയം യുവതിയുടെ പരാതിയില്‍ ഒരാളെ പോലീസ് അറസ്റ്റ് ചെയ്തു. ബസ്സും പോലീസ് കസ്റ്റഡിയില്‍ എടുത്തു. ബസ്സിന്റെ ഉടമയേയും കൂടെയുള്ള മറ്റൊരു ഡ്രൈവര്‍ക്കുമായി അന്വേഷണം ഊര്‍ജിതമാക്കിയതായി പോലീസ് പറയുന്നു. ബസ്സില്‍ ആ സമയം യാത്ര ചെയ്തവരുടെ മുഴുവന്‍ വിവരങ്ങള്‍ ശേഖരിച്ചതായും ഇവരുടെ മൊഴി രേഖപ്പെടുത്തിയതായും പോലീസ് അറിയിച്ചു.
