കൊച്ചി: എഐ ക്യാമറ അഴിമതിയില് ട്രാഫിക് ക്യാമറ കൊട്ടകൊണ്ട് മറച്ച് യൂത്ത് ലീഗ് നേതാവ് പികെ ഫിറോസിന്റെ പ്രതിഷേധം. ട്രാഫിക് ക്യാമറ കൊട്ടകൊണ്ട് മറിച്ച് പ്രതീകാത്മക പ്രതിഷേധവുമായാണ് പികെ ഫിറോസ് സര്ക്കാരിനെതിരെ രംഗത്തെത്തിയത്. കൊട്ടിയില് യൂത്ത് ലീഗ് സംഘടിപ്പിച്ച പ്രതിഷേധത്തിനിടെയായായിരുന്നു ലീഗ് നേതാവിന്റെ കൊട്ട കൊണ്ടുള്ള പ്രതിഷേധം. ട്രാഫിക് ക്യാമറയെ മുളകൊണ്ടുണ്ടാക്കിയ കൊട്ടകൊണ്ട് മറച്ച്, മൂടി വെക്കാനാകില്ല ഈ അഴിമതിയെന്ന കുറിപ്പോടെ ഫിറോസ് പ്രതിഷേധത്തിന്റെ ചിത്രം ഫേസ്ബുക്കില് പങ്കുവെച്ചു.
അതേസമയം ഗതാഗത നിയമലംഘനം കണ്ടെത്തുന്നതിനായി എഐ ക്യാമറ സ്ഥാപിക്കുന്നതില് നടന്നത് സര്വത്ര ഗൂഢാലോചനയെന്ന് പ്രതിപക്ഷ നേതാവ് വി ഡി സതീശനും ആരോപിച്ചു. 235 കോടിക്ക് എസ്റ്റിമേറ്റ് തയ്യാറാക്കുന്നത് മുതല് ഗൂഢാലോചന നടന്നു. എല്ലാ ഇടപാടിനും കെല്ട്രോണിന്റെ ഒത്താശയുണ്ടെന്നും വി ഡി സതീശന് പറഞ്ഞു.