തിരുവനന്തപുരം: ആര്ട്ടിഫിഷ്യല് ഇന്റലിജന്സില് അധിഷ്ഠിതമായി പ്രവര്ത്തിക്കുന്ന ക്യാമറകള് കണ്ടെത്തുന്ന നിയമലംഘനങ്ങള്ക്ക് ജൂണ് അഞ്ച് മുതല് പിഴ ഈടാക്കി തുടങ്ങും. സംസ്ഥാനവ്യാപകമായി 726 ആര്ട്ടിഫിഷ്യല് കാമറകളാണ് സ്ഥാപിച്ചിരിക്കുന്നത്. ദേശീയ,സംസ്ഥാന പാതകളില് കാമറകള് സ്ഥാപിച്ചിട്ടുണ്ട്. ഇതില് 675 എണ്ണം ഹെല്മെറ്റ്, സീറ്റ്ബെല്റ്റ് എന്നിവ ധരിക്കാതെയുള്ളവരെ കണ്ടെത്തുന്നതിനും അപകടം ഉണ്ടാക്കിയ ശേഷം കടന്നുകളയുന്ന വാഹനങ്ങളെ കണ്ടെത്തുന്നതിനുമുള്ളവയാണ്.
ഇത്തരം നിയമ ലംഘനങ്ങള്ക്കും മഞ്ഞവര മുറിച്ചുകടക്കല്, വളവുകളില് വരകളുടെ അതിര്ത്തി ലംഘിച്ച് ഓവര്ടേക്കിങ് എന്നിവയ്ക്കും ഇപ്പോഴത്തെ പിഴതന്നെയാകും ചുമത്തുക. എല്ലാ ജില്ലകളിലും കണ്ട്രോള് റൂം ഉണ്ടായിരിക്കും. കാമറയില് പതിയുന്ന നിയമ ലംഘനങ്ങള് അതാത് സമയങ്ങളില് വാഹന ഉടമയുടെ മൊബൈലിലേക്ക് സന്ദേശമായി അയയ്ക്കും. ഹെല്മറ്റ് ധരിച്ചില്ലെങ്കില് 500 രൂപ, സീറ്റ് ബെല്റ്റ് ധരിച്ചില്ലെങ്കില് 500 രൂപ, ടു വീലറില് രണ്ടില് കൂടുതല് പേര് യാത്ര ചെയ്താല് 1000 രൂപ, ഡ്രൈവിങ്ങിനിടെ ഫോണ് ഉപയോഗിച്ചാല് 2000 രൂപ, അനധികൃത പാര്ക്കിംഗ് 250 രൂപ, അമിതവേഗം 1500 രൂപ എന്നിങ്ങനെയാണ് പിഴ. ജംഗ്ഷനുകളില് ചുവപ്പു സിഗ്നല് ലംഘനം കോടതിക്കു കൈമാറും. ഓരോ തവണ ക്യാമറയില് പതിയുമ്പോഴും പിഴ ആവര്ത്തിക്കും. ഇരുചക്ര വാഹനങ്ങളിലെ മൂന്നാം യാത്രക്കാരന് 12 വയസില് താഴെയാണെങ്കില് പിഴ ഈടാക്കില്ലെന്ന് എംവിഡി തീരുമാനിച്ചിരുന്നു.
