പാലക്കാട് : പൗരത്വ നിയമഭേദഗതിക്കെതാരായി പ്രമേയം പാസാക്കിയ നിയമസഭാ നടപടിയെ വിമര്‍ശിച്ച കേരളാ ഗവര്‍ണറെ പുറത്താക്കാനുള്ള പ്രമേയം അവതരിപ്പിക്കാന്‍ പ്രമേയം തേടിയ പ്രതിപക്ഷത്തിന്റെ നടപടിയില്‍ പ്രതികരണവുമായി എ കെ ബാലന്‍. സര്‍ക്കാരിനെ സംരക്ഷിക്കാനുള്ള നീക്കത്തില്‍ ഞങ്ങളാണ് മുന്‍പന്തിയില്‍ എന്നുള്ള ധാരണ ആര്‍ക്കും തന്നെ വേണ്ട. സംസ്ഥാന സര്‍ക്കാരും ഗവര്‍ണറും തമ്മിലുള്ള പ്രശ്‌നം കൂടുതല്‍ വഷളാകാന്‍ അനുവദിക്കില്ല എന്ന് അദ്ദേഹം പാലക്കാട് പറഞ്ഞു.
ഭരണഘടനാപരമായി തന്നെ സ്പീക്കറും സര്‍ക്കാരും ഗവര്‍ണറും അവരുടെ കടമകള്‍ നിര്‍വഹിക്കും. അതില്‍ എന്തെങ്കിലും വീഴ്ച സംഭവിക്കുകയാണെങ്കില്‍ അത് ചര്‍ച്ച ചെയ്യും. അതിനുള്ള വേദി നിയമസഭയാകുന്നതില്‍ തെറ്റില്ലെന്നും അദ്ദേഹം പറഞ്ഞു. എന്നാല്‍ കലക്കവെള്ളത്തില്‍ മീന്‍പിടിക്കുന്നതുപോലെ സര്‍ക്കാര്‍ ഗവര്‍ണര്‍ വിഷയം പ്രതിപക്ഷം ഉപയോഗിക്കുന്നത് അംഗീകരിക്കാനാവില്ലെന്നും അദ്ദേഹം പറഞ്ഞു.
ഗവര്‍ണര്‍ക്ക് ഭരണഘടനാ പരമായി ചില അവകാശങ്ങള്‍ ഉണ്ട്. അത് നിഷേധിക്കുന്നില്ല. സംശയങ്ങളും വിമര്‍ശനങ്ങളും സ്വാഭാവികമാണ്. അതിന് സര്‍ക്കാര്‍ അപ്പോള്‍ തന്നെ മറുപടി നല്‍കുമെന്നാണ് എ കെ ബാലന്‍ പ്രതികരിച്ചത്.
