ലഖ്നോ : പ്രധാനമന്ത്രി നരേന്ദ്രമോദിയുടെ വാരാണസി സന്ദര്ശനത്തിനു നേരെ പരിഹാസവുമായി സമാജ്വാദി പാര്ട്ടി നേതാവ് അഖിലേഷ് യാദവ്. അന്ത്യമടുക്കുമ്പോൾ ആളുകൾ കാശിയിൽ തങ്ങുകയാണെന്ന് അഖിലേഷ് പറഞ്ഞു. വാരാണസിയിൽ ഒരുമാസം നീണ്ടുനിൽക്കുന്ന സാംസ്കാരിക പരിപാടികൾ സർക്കാർ ആസൂത്രണം ചെയ്തിട്ടുണ്ടല്ലോയെന്ന മാധ്യമപ്രവർത്തകരുടെ ചോദ്യത്തോട് പ്രതികരിക്കുകയായിരുന്നു അദ്ദേഹം.
‘‘നല്ലകാര്യമാണ്. എന്തിനാണ് ഒരുമാസം? അദ്ദേഹത്തിന് രണ്ടോ മൂന്നോ മാസം താമസിക്കാമല്ലോ. താമസത്തിനുപറ്റുന്ന സ്ഥലമാണ്. അവസാനമടുക്കുമ്പോൾ ആളുകൾ ബനാറസിൽ തങ്ങുന്നു’’ -അഖിലേഷ് പരിഹസിച്ചു. ദൈവത്തിന്റെ മുന്നിൽ കള്ളം പറയുന്നത് ബി.ജെ.പി. ഒഴിവാക്കണമെന്നും തന്റെ സർക്കാർ ചെയ്ത വികസനപ്രവർത്തനങ്ങളുടെ നേട്ടമാണ് ബി.ജെ.പി അവകാശപ്പെടുന്നതെന്നും അഖിലേഷ് പറഞ്ഞു.