ആലപ്പുഴ : ജില്ലാപഞ്ചായത്തിൻ്റെ നേതൃത്വത്തിൽ ഫെബ്രുവരി 15ന് ആലപ്പുഴ എസ് ഡി കോളേജിൽ സംഘടിപ്പിക്കുന്ന വിജ്ഞാന ആലപ്പുഴ മെഗാ തൊഴിൽമേളയിൽ തൊഴിലന്വേഷകരെ കാത്തിരിക്കുന്നത് വൻ അവസരങ്ങൾ. എസ്എസ്എൽസി, പ്ലസ് ടു, ഐടിഐ, ബിരുദം, ഡിപ്ലോമ, ബിരുദാനന്തര ബിരുദം തുടങ്ങിയ മേഖലകളിലായി 252ൽ അധികം തസ്തികകളാണ് നിലവിലുള്ളത്. ഈ മാസം അഞ്ച് വരെയുള്ള കണക്ക് പ്രകാരം 33466 ഒഴിവുകൾ പോർട്ടലിലുണ്ട്. 3153 തൊഴിലന്വേഷകർ ഇതുവരെ രജിസ്റ്റർ ചെയ്തു. വിവിധ തസ്തികകളിലേക്കായി ഇവരിൽ നിന്ന് 4931 അപേക്ഷകൾ ലഭിച്ചിട്ടുണ്ട്. പതിനായിരം രൂപ മുതൽ മൂന്നര ലക്ഷം രൂപവരെ മാസ വരുമാനമുള്ള ജോലികളാണ് പോർട്ടലിലുള്ളത്. വരും ദിവസങ്ങളിൽ കൂടുതൽ ഒഴിവുകൾ പോർട്ടലിൽ ലഭ്യമാക്കും.
ഡിജിറ്റല്‍ വര്‍ക്ക് ഫോഴ്‌സ് മാനേജ്മെന്റ് സിസ്റ്റം (ഡി ഡബ്ല്യൂ എം എസ്) പോര്‍ട്ടലില്‍ രജിസ്റ്റര്‍ ചെയ്യുന്നവര്‍ക്ക് മാത്രമാണ് തൊഴില്‍ മേളയില്‍ പങ്കെടുക്കാന്‍ അവസരം. ലോഗിൻ ചെയ്യുന്ന തൊഴിലന്വേഷകർക്ക് ജോലിയുടെ സ്വഭാവം, പ്രവൃത്തിപരിചയം, സ്ഥലം, പ്രാഗൽഭ്യം തുടങ്ങിവ തിരഞ്ഞെടുത്ത് അവരവരുടെ അഭിരുചിക്കനുസരിച്ചുള്ള ജോലികൾ വേഗത്തിൽ കണ്ടെത്താനാകും. തൊഴിലന്വേഷകർ പോര്‍ട്ടല്‍ വഴി മുന്‍കൂട്ടി അപേക്ഷിച്ചു തൊഴില്‍മേളക്ക് എത്തുന്നതാണ് അഭികാമ്യം.
