കോന്നി : ഇളമണ്ണൂരിൽ വാഹനാപകടത്തിൽ യുവാവിന് ദാരുണാന്ത്യം. അടൂർ കണ്ണംകോട് അയ്യപ്പൻപാറ സ്വദേശി മേഘനാധ് മധു (19) ആണ് മരിച്ചത്. രാവിലെ പത്ത് മണിയോടെ കെ പി റോഡിൽ ഇളമണ്ണൂർ ഹൈസ്കൂൾ ജംഗ്ഷനിൽ ആയിരുന്നു അപകടം നടന്നത്. സ്കൂട്ടറിൽ സഞ്ചരിച്ച യുവാവിനെ ഇന്നോവ കാർ ഇടിക്കുകയും ഇടിയുടെ ആഘാതത്തിൽ യുവാവ് തെറിച്ച് പോയി സമീപത്ത് കൂടി കടന്നുപോയ ടിപ്പറിന് അടിയിലേക്ക് വീഴുകയുമായിരുന്നു. ടിപ്പറിന്റെ ടയറുകൾ യുവാവിന്റെ തലയിലൂടെ കയറി ഇറങ്ങിയാണ് മരണം സംഭവിച്ചത്.
ടിപ്പറിന് അടിയിൽ പെട്ട യുവാവിനെയും വാഹനത്തെയും ഏകദേശം നൂറ് മീറ്ററോളം റോഡിലൂടെ വലിച്ചിഴച്ച് കൊണ്ടുപോയതായും ദൃക്സാക്ഷികൾ പറയുന്നു. ഇന്നോവ കാർ ഇരുചക്രവാഹനത്തെ മറികടക്കാൻ ശ്രമിക്കുമ്പോഴാണ് അപകടം സംഭവിച്ചതെന്ന് സി സി റ്റി വി ദൃശ്യങ്ങളിൽ നിന്ന് വ്യക്തമാണ്. അപകടത്തിന് ശേഷം കാർ നിർത്താതെ പോവുകയും ചെയ്തു. അടൂർ പോലീസും അഗ്നിരക്ഷാ സേനയും സ്ഥലത്തെത്തി നടപടികൾ സ്വീകരിച്ചു. മൃതദേഹം പോസ്റ്റ്മോർട്ടം നടപടികൾക്ക് ശേഷം ബന്ധുകൾക്ക് വിട്ടു നൽകും
