തിരുവനന്തപുരം: സംസ്ഥാനത്ത് ഇനി പേ വിഷ ബാധക്കുള്ള വാക്സിന് എല്ലാവര്ക്കും സൗജന്യമാല്ല. ബിപിഎല്ലുകാര്ക്ക് മാത്രമായി പരിമിതപ്പെടുത്താനാണ് സര്ക്കാറിന്റെ നീക്കം. പേവിഷബാധയ്ക്കുള്ള ചികിത്സ ഉയര്ന്നവരുമാനമുള്ളവര്ക്ക് സൗജന്യമായി നല്കേണ്ടെന്നാണ് ആരോഗ്യവകുപ്പിന്റെ തീരുമാനം. തെരുവുനായ കടിച്ചാലും വളര്ത്തുമൃഗങ്ങള് കടിച്ചാലും നിലവില് സര്ക്കാര് ആശുപത്രകളില് ചികിത്സ സൗജന്യമാണ്. ഈ രീതിക്കാണ് മാറ്റം വരുന്നത്.
പേവിഷ ബാധയേറ്റ് ചികിത്സക്ക് വരുന്നവരില് 70 ശതമാനവും ഉയര്ന്ന വരുമാനമുള്ളവരാണ്. ഇവരില് ഏറെപേരും എത്തുന്നത് വീട്ടില് വളര്ത്തുന്ന മൃഗങ്ങളുടെ കടിയേറ്റാണെന്നും മെഡിക്കല് കോളജുകളില് ആരോഗ്യവകുപ്പ് നടത്തിയ പഠനം വ്യക്തമാക്കുന്നു. വളര്ത്തുമൃഗങ്ങള് കടിച്ച് പേ വിഷ ബാധയുണ്ടായി ചികിത്സതേടുന്നവരില് നിന്ന് വാക്സിന്റേയും അനുബന്ധ മരുന്നുകളുടേയും പണം ഈടാക്കണമെന്ന് ആരോഗ്യവകുപ്പ് നിര്ദേശം വെച്ചിട്ടുണ്ട്.
