പനമരം: മാര്‍ബിള്‍ കടയില്‍ കവര്‍ച്ച നടത്തിയ രാജസ്ഥാന്‍ സ്വദേശികള്‍ പിടിയില്‍. വയനാട് പനമരം കൂളിവയല്‍ കാട്ടുമാടം മാര്‍ബിള്‍സിലാണ് കഴിഞ്ഞ വെള്ളിയാഴ്ചയാണ് മോഷണം നടന്നത്. സ്ഥാപനത്തിലെ തൊഴിലാളികളായിരുന്ന 5 പേരെ മണിക്കൂറുകള്‍ക്കകം മംഗളൂരുവില്‍ നിന്ന് പോലീസ് പിടികൂടുകയായിരുന്നു. രാജസ്ഥാന്‍ സ്വദേശികളായ ശങ്കര്‍, ഗോവിന്ദന്‍, പ്രതാപ്, വികാസ്, രാഗേഷ് എന്നിവരാണ് പിടിയിലായത്.
സ്ഥാപനത്തിലെ ലോക്കര്‍ തകര്‍ത്ത് 2.34 ലക്ഷം രൂപയാണ് ഇവര്‍ മോഷ്ടിച്ചത്. ഉടമ നല്‍കിയ പരാതിയെ തുടര്‍ന്ന് പോലീസ് സി സി ടി വി ദൃശ്യങ്ങളും മൊബൈല്‍ ലോക്കേഷനും കേന്ദ്രികരിച്ച് നടത്തിയ അന്വേഷണത്തിലാണ് 8 മണിക്കൂറിനുള്ളില്‍ പ്രതികള്‍ പിടിയിലായത്. മോഷണം നടത്തിയ സംഘം കോഴിക്കോട് റയില്‍വേ സ്റ്റേഷനിലെത്തി മലബാര്‍ എക്സ്പ്രസില്‍ മംഗളുരുവിലേക്ക് കടന്നതായി സൂചന ലഭിച്ചിരുന്നു. തുടര്‍ന്ന് സ്ഥലത്തെത്തിയ കേരള പോലീസ് മംഗളുരു റെയില്‍വെ പോലീസുമായി നടത്തിയ സംയുക്ത അന്വേഷണത്തിനൊടുവിലാണ് പ്രതികള്‍ പിടിയിലായത്.
