ഇക്വഡോർ: കോഴിപ്പോരിനിടെ സൈനിക വേഷത്തിലെത്തിയ സംഘം 12 പേരെ വെടിവെച്ച് കൊലപ്പെടുത്തി. ഇക്വഡോറിൻ്റെ വടക്ക് പടിഞ്ഞാറൻ പ്രവിശ്യയായ മാനബിയിലാണ് സംഭവം. സംഭവത്തിൽ നിരവധി പേർക്ക് പരുക്കുണ്ട്. ആക്രമണത്തിന് ഉത്തരവാദികളായവരെ പോലീസ് അറസ്റ്റ് ചെയ്തു. ലോസ് ആർ 7 എന്ന ക്രിമിനൽ സംഘവുമായി ബന്ധമുള്ളവരാണ് ഇവരെന്നാണ് വിവരം. കോഴിപ്പോര് നടന്നിരുന്ന റിങ്ങിലേക്ക് തോക്കുമായി അതിക്രമിച്ച് കടന്ന അക്രമി കാഴ്ചക്കാർക്കിടയിലേക്ക് വെടിവെക്കുകയായിരുന്നു. അഞ്ചിലേറെ പേരാണ് അക്രമം നടത്തിയത്. വെടിയുതിർത്ത ശേഷം ദേശീയ പാതയിലേക്കെത്തിയ സംഘം കാറും വേഷവും ഉപേക്ഷിച്ച് സംഭവ സ്ഥലത്ത് നിന്നും കടന്നുകളഞ്ഞു.
ആക്രമണത്തിന് അക്രമികൾ ധരിച്ചിരുന്ന സേനാ വേഷം വ്യാജമാണെന്ന് പോലീസ് കണ്ടെത്തിയിരുന്നു. ഇതിന് പിന്നാലെ ലാ വലൻസിയയിൽ നടത്തിയ റെയ്ഡിൽ തോക്കും പോലീസുകാരുടെ വ്യാജ യൂണിഫോമുകളും എട്ട് റൈഫിളുകൾ, നാല് പിസ്റ്റളുകൾ, മൂന്ന് ഷോട്ട് ഗണ്ണുകൾ, തിരകൾ നിറയ്ക്കുന്ന എട്ട് മാഗ്സിനുകൾ, 11 സെൽഫോൺ, ബാലിസ്റ്റിക് ഹെൽമെറ്റുകൾ, ടാക്റ്റിക്കൾ കയ്യുറകൾ എന്നിവയും കണ്ടെത്തി. ഇതിന് ശേഷമാണ് നാല് പേർ പോലീസിൻ്റെ പിടിയിലാകുന്നത്. ആക്രമണത്തിലേക്ക് നയിച്ച കാരണം ഇപ്പോഴും വ്യക്തമല്ല.
