കോഴിക്കോട്: വെള്ളയില് ആവിക്കല്ത്തോട് മലിനജല പ്ലാന്റിനെതിരെ ശക്തമായ പ്രതിഷേധവുമായി നാട്ടുകാര് രംഗത്ത്. നിര്ദിഷ്ട പ്ലാന്റിന്റെ സര്വേ പുനരാരംഭിക്കുന്നതിനെതിരായാണ് പ്രതിഷേധം. സര്വേ നടക്കുന്ന ഭാഗത്തേക്ക് ജനങ്ങള് മാര്ച്ച് നടത്തി. ഡി.സി.പിയുടെ നേതൃത്വത്തിലുള്ള വന് പോലീസ് സന്നാഹമെത്തി മാര്ച്ച് തടഞ്ഞു. സമരസമിതി നേതാക്കളായ ബഷീര്, മുജീബ് എന്നിവരെ പോലീസ് കസ്റ്റഡിയിലെടുത്തു. അതോടെ പ്രതിഷേധക്കാര് ബീച്ച് റോഡില് പോലീസ് വണ്ടിക്ക് മുന്നില് ഇരുന്നും കിടന്നും പ്രതിഷേധിച്ചു. കോര്പ്പറേഷന്റെ അഴിമതിയില് നിന്ന് ശ്രദ്ധ തിരിച്ചുവിടാനാണ് സര്വേ നടത്തുന്നതെന്ന് പ്രതിഷേധക്കാര് ആരോപിച്ചു. പ്രതിഷേധം ശക്തമായതോടെ ബീച്ച് റോഡിന്റെ ഇരുവശവും ഗതാഗതം സ്തംഭിച്ചു.
എം.കെ രാഘവര് എം.പി, പി.എം നിയാസ്, വാര്ഡ് കൗണ്സിലര് സോഫിയ, കെ.എസ്.യു സംസ്ഥാന പ്രസിഡന്റ് കെ.എം. അഭിജിത്ത് തുടങ്ങി കോണ്ഗ്രസ് നേതാക്കള് പ്രതിഷേധ സ്ഥലത്തെത്തി. പോലീസുമായി ചര്ച്ച നടത്തി. മലിനജല പ്ലാന്റ് നിര്മാണം സംബന്ധിച്ച് നേരത്തെ തന്നെ കോര്പ്പറേഷനുമായി സംസാരിച്ചിരുന്നെന്ന് എം.കെ. രാഘവന് എം.പി പറഞ്ഞു. ജനങ്ങളുടെ ആശങ്ക പൂര്ണമായി ദുരീകരിക്കാത പദ്ധതി നടപ്പാക്കരുതെന്ന് പറഞ്ഞിരുന്നു. ജനങ്ങള്ക്ക് വേണ്ടാത്ത പദ്ധതി അവരെ അടിച്ചേല്പ്പിക്കുന്നത് അംഗീകരിക്കാനാവില്ലെന്നും എം.കെ. രാഘവര് എം.പി പറഞ്ഞു. മലിനജല പ്ലാന്റുമായി മുന്നോട്ടുപോകുമെന്ന് കലക്ടര് ഡോ. നരസിംഹുഗാരി ടി.എല്.റെഡ്ഢി പറഞ്ഞു. ജനങ്ങളുമായി കോര്പ്പറേഷന് നിരവധി തവണ ചര്ച്ച നടത്തിയതാണ്. വിഷയത്തില് സര്വ കക്ഷിയോഗം വിളിക്കേണ്ടതില്ല. പരാതിയുള്ളവര്ക്ക് തന്നെ സമീപിക്കാമെന്നും കലക്ടര് വ്യക്തമാക്കി.
