കോഴഞ്ചേരി: അയിരൂർ പഞ്ചായത്തിന്റെ നേതൃത്വത്തിൽ നടത്തുന്ന അയിരൂര് മാനവ മൈത്രി ചതയ ദിന ജലോത്സവം നാളെ പുതിയ കാവ് ദേവി ക്ഷേത്രക്കടവിലെ പമ്പാ നദിയുടെ നെട്ടയത്തിൽ നടക്കും. ആറന്മുള ഉതൃട്ടാതി ജലമേളയിൽ പങ്കെടുക്കുന്ന 21 പള്ളിയോടങ്ങൾ ഇക്കുറി ചതയ ജലോത്സവത്തിൽ പങ്കെടുക്കും. ജലപ്രളയവും കോവിഡും കാരണം കഴിഞ്ഞ രണ്ടു വർഷം ജലോത്സവം മുടങ്ങിക്കിടക്കുകയായിരുന്നു. ജലോത്സവത്തിന് മുന്നോടിയായി കഴിഞ്ഞ ദിവസം പുതിയകാവ് ക്ഷേത്ര നടയിൽ നിന്ന് വിളംബര ജാഥ നടന്നു. പഞ്ചായത്ത് പ്രസിഡന്റ് അനിതാ കുറുപ്പ് ഫ്ലാഗ് ഓഫ് ചെയ്തു. പ്രദീപ് അയിരൂർ അധ്യക്ഷത വഹിച്ചു.
നാളെ രാവിലെ 9 മണിക്ക് പഞ്ചായത്ത് പ്രസിഡന്റ് അനിതാ കുറുപ്പ് പതാക ഉയർത്തും. 10 മണിക്ക് വഞ്ചിപ്പാട്ട് മത്സരം ആരംഭിക്കും. ഉച്ചയ്ക്ക് ശേഷം 2.30 ന് ജലമേളയോടനുബന്ധിച്ചു നടക്കുന്ന പൊതു സമേളനം ആന്റോ ആന്റണി എം പി ഉദ്ഘാടനം ചെയ്യും. പള്ളിയോടങ്ങളുടെ ജല ഘോഷയാത്ര റാന്നി എം എൽ എ അഡ്വ. പ്രമോദ് നാരായണ് ഉദ്ഘാടനം ചെയ്യും. സിനിമാതാരം കൈലേഷ് മുഖ്യാഥിതിയായിരിക്കും.
തിരുവിതാംകൂർ ദേവസ്വം ബോർഡ് പ്രസിഡന്റ് കെ അനന്തഗോപന് മുഖ്യപ്രഭാഷണം നടത്തും. പള്ളിയോടങ്ങൾക്കുള്ള ഗ്രാന്റ് വിതരണം ജില്ലാ പഞ്ചായത്ത് പ്രസിഡന്റ് അഡ്വ ഓമല്ലൂർ ശങ്കരനും ട്രോഫി വിതരണം ജില്ലാ കലക്ടർ ദിവ്യ എസ്. അയ്യരും നിർവ്വഹിക്കും. വഞ്ചിപ്പാട്ട് മത്സരവിജയികൾക്കുള്ള ക്യാഷ് അവാർഡ് മുൻ എം എൽ എ രാജു ഏബ്രഹാമും, ട്രോഫികൾ പള്ളിയോട സേവാ സംഘം പ്രസിഡന്റ് കെ എസ് രാജനും വിതരണം ചെയ്യും.
