ബംഗാൾ തെരഞ്ഞെടുപ്പ് കലാപം ; പ്രശ്‌നബാധിത ബൂത്തുകളുടെ കണക്ക് നൽകിയില്ലെന്ന് ബിഎസ്എഫ്

ബംഗാൾ : പഞ്ചായത്ത് തെരഞ്ഞെടുപ്പുമായി ബന്ധപ്പെട്ട് ബംഗാളിലുണ്ടായ വ്യാപക അക്രമങ്ങളില്‍ തെരഞ്ഞെടുപ്പ് കമ്മീഷനെതിരെ ബിഎസ്എഫ്. സംസ്ഥാനത്തെ പ്രശ്നബാധിത ബൂത്തുകളുടെ കൃത്യമായ കണക്ക് നല്‍കിയില്ലെന്ന് ബി.എസ്.എഫ് ഡിഐജി എസ് എസ് ഗുലേറിയ വ്യക്തമാക്കി. നിരവധി തവണ ഇക്കാര്യം ചൂണ്ടിക്കാട്ടി കത്തുകളയച്ചെങ്കിലും തെരഞ്ഞെടുപ്പിന്റെ തലേന്ന് മാത്രമാണ് കമ്മീഷന്‍ പ്രതികരിച്ചതെന്നും അര്‍ധ സൈനികരെയും സായുധ പോലീസിനെയും വേണ്ട വിധത്തില്‍ ഉപയോഗിച്ചില്ലെന്നും അദ്ദേഹം കുറ്റപ്പെടുത്തി. അക്രമ സംഭവങ്ങള്‍ കണക്കിലെടുത്ത് റീ പോളിങ് നടത്തണമെന്നുയര്‍ന്ന ആവശ്യത്തില്‍ തെരഞ്ഞെടുപ്പ് കമ്മീഷന്‍ ഇന്ന് തീരുമാനമെടുക്കും.

തിരഞ്ഞെടുപ്പിനെ തുടർന്ന് ഉണ്ടായ അക്രമങ്ങളിൽ മുപ്പതിലേറെപ്പേരാണ് ഇതുവരെ ബംഗാളില്‍ കൊല്ലപ്പെട്ടത്. ഇന്നലെ വോട്ടെടുപ്പിനിടെയുണ്ടായ സംഘര്‍ഷങ്ങളില്‍ മാത്രം 16 പേര്‍ക്ക് ജീവന്‍ നഷ്ടമായിരുന്നു. മുർഷിദാബാദിൽ പോലീസ് വാഹനത്തിന് അക്രമികൾ തീയിട്ടു. സിസിടിവി ദൃശ്യങ്ങൾ പരിശോധിക്കണമെന്നും സംഘർഷമുണ്ടായ ഇടങ്ങളിൽ വീണ്ടും വോട്ടെടുപ്പ് നടത്തണമെന്നും ബിജെപി ആവശ്യപ്പെട്ടിട്ടുണ്ട്.

അക്രമങ്ങളെക്കുറിച്ച് സിബിഐയും എൻഐഎയും അന്വേഷിക്കണമെന്ന് പ്രതിപക്ഷ നേതാവ് സുവേന്ദു അധികാരി പറഞ്ഞു. തെരഞ്ഞെടുപ്പ് നിരീക്ഷകരുടെയും റിട്ടേണിങ് ഓഫീസർമാരുടെയും റിപ്പോർട്ട് ലഭിച്ച ശേഷം വീണ്ടും വോട്ടെടുപ്പ് നടത്തുന്ന കാര്യത്തിൽ തീരുമാനമെടുക്കുമെന്ന് ബംഗാൾ തെരഞ്ഞെടുപ്പ് കമ്മീഷണർ രാജിവ സിൻഹ പ്രതികരിച്ചു. രാഷ്ട്രപതി ഭരണം ഏർപ്പെടുത്തണമെന്ന് ബിജെപി ആവശ്യപ്പെടുന്നത് പരാജയം മുന്നിൽക്കണ്ടാണെന്ന് തൃണമൂൽ കോൺഗ്രസ് തിരിച്ചടിച്ചു.