കൊല്ലം: ഈസ്റ്റർ ആഘോഷങ്ങളുടെ ഭാഗമായി ബംഗളൂരുവിൽനിന്നും മധ്യതിരുവതാംകൂറിലേക്ക് ട്രെയിൻ യാത്ര സുഗമമാക്കുന്നതിനായി ബംഗളൂരുവിൽനിന്നും കോട്ടയം വഴി കൊല്ലത്തേക്ക് രണ്ട് സ്പെഷൽ ട്രെയിനുകൾ അനുവദിപ്പിച്ചതായി കൊടിക്കുന്നിൽ സുരേഷ് എംപി. ട്രെയിൻ നമ്പർ 06577/06578 എസ്എംവിടി ബംഗളൂരു-കൊല്ലം-എസ്എംവിടി ബംഗളൂരു സ്പെഷൽ ഏപ്രിൽ 17ന് ബംഗളൂരുവിൽനിന്ന് യാത്ര തിരിച്ച് 18ന് കൊല്ലത്തു നിന്നും ബംഗളൂരിവിലേക്ക് തിരികെ പോകും. ട്രെയിൻ നമ്പർ 06585/06586 എസ്എംവിടി ബംഗളൂരു-കൊല്ലം-എസ്എംവിടി ബംഗളൂരു സ്പെഷൽ ഏപ്രിൽ 19ന് ബംഗളൂരുവിൽനിന്നും കൊല്ലത്തേക്ക് യാത്ര തിരിച്ച് 20ന് കൊല്ലത്തു നിന്നും ബംഗളൂരിവിലേക്ക് തിരികെ പോകും.
യാത്രക്കാരുടെ തിരക്ക് പരിഗണിച്ച് റെയിൽവേ മന്ത്രിയോട് പ്രത്യേകമായി ആവശ്യപ്പെട്ടാണ് സ്പെഷൽ ട്രെയിനുകൾ അനുവദിപ്പിച്ചതെന്ന് കൊടിക്കുന്നിൽ സുരേഷ് പറഞ്ഞു. ഇരു ട്രെയിനുകളും ഓരോ സർവീസ് വീതം ആയിരിക്കും നടത്തുക. മാവേലിക്കര മണ്ഡലത്തിലെ പ്രധാന സ്റ്റേഷനുകളായ ചങ്ങനാശേരി, ചെങ്ങന്നൂർ, മാവേലിക്കര എന്നിവിടങ്ങളിൽ ഇരു ട്രെയിനുകൾക്കും സ്റ്റോപ്പ് ഉണ്ട്. നിരന്തരമായ ശ്രമത്തിന്‍റെ ഫലമായി ബംഗളൂരുവിലും കേരളത്തിലുമായി ജോലി ചെയ്യുന്ന ഒട്ടനവധി തൊഴിലാളികൾക്കും വിദ്യാർഥികൾക്കും ആശ്വാസം നൽകുന്ന രീതിയിലാണ് ഈ സർവീസ് പ്രഖ്യാപിച്ചിരിക്കുന്നതെന്ന് കൊടിക്കുന്നിൽ സുരേഷ് പറഞ്ഞു.
കൊല്ലം വഴി കൂടുതൽ റൂട്ടുകളിൽ പ്രത്യേക ട്രെയിനുകൾ അനുവദിക്കണമെന്ന് റെയിൽവേ അധികൃതരോട് തുടർച്ചയായി ആവശ്യപ്പെട്ടുകൊണ്ടിരിക്കുകയാണെന്നും കൊടിക്കുന്നിൽ സുരേഷ് കൂട്ടിച്ചേർത്തു. ഇരു ട്രെയിനുകളിലും ഓരോ എസി 2 ടയർ 3 ടയർ കോച്ചുകളും എട്ട് സ്ലീപ്പർ കോച്ചുകളും നാലു വീതം ജനറൽ കോച്ചുകളും രണ്ട് സെക്കൻഡ് സിറ്റിംഗ് കോച്ചുകളും ഉണ്ടായിരിക്കും.
