ലോകത്തിലെ ഏറ്റവും മനോഹരമായ ബീച്ചുകളിലൊന്നായി തെരഞ്ഞെടുക്കപ്പെട്ടവയില്‍ കേരളത്തിന് അഭിമാനമായി വര്‍ക്കല പാപനാശം ബീച്ചും. ലോണ്‍ലി പ്ലാനറ്റ് എന്ന പ്രസിദ്ധീകരണത്തിലാണ് ലോകത്തിലെ ഏറ്റവും മനോഹരമായ ബീച്ചുകളില്‍ പാപനാശം ബീച്ച് ഇടംപിടിച്ചത്. സഞ്ചാരികള്‍ കണ്ടിരിക്കേണ്ട ലോകത്തെ ഏറ്റവും മനോഹരമായ 100 ബീച്ചുകളില്‍ ഒന്നായാണ് ലോണ്‍ലി പ്ലാനറ്റിന്റെ ബീച്ച് ഗൈഡ് ബുക്ക് പാപനാശത്തെ തിരഞ്ഞെടുത്തത്. തിരുവനന്തപുരത്ത് നിന്ന് 45 കിലോമീറ്റര്‍ അകലെയുള്ള വര്‍ക്കലയിലേക്ക് റോഡ് മാര്‍ഗവും റെയില്‍ മാര്‍ഗവും എത്താവുന്നതാണ്. വിദേശികള്‍ അടക്കമുള്ള ആയിരക്കണക്കിന് വിനോദ സഞ്ചാരികളാണ് വര്‍ഷം തോറും ഇവിടേക്ക് എത്തുന്നത്.
അറബി കടലിന്റെ തീരങ്ങളില്‍ മുനമ്പുകള്‍ തീരത്തോട് ചേര്‍ന്ന് കാണുന്ന ഏക ബീച്ചും ഇതാണ്. ലോകമെമ്പാടുമുള്ള യാത്രാ പ്രേമികള്‍ വായനക്കാരായിട്ടുള്ള പ്രസിദ്ധീകരണമാണ് ലോണ്‍ലി പ്ലാനെറ്റ്. ഇന്ത്യയില്‍ നിന്ന് മൂന്ന് ബീച്ചുകളാണ് ഈ പട്ടികയില്‍ ഇടം നേടിയിട്ടുള്ളത്. ആന്‍ഡമാന്‍ ദ്വീപിലെ രാധാനഗര്‍ ബീച്ച്, ഗോവയിലെ പാലോലം ബീച്ച് എന്നിവയാണ് വര്‍ക്കല ബീച്ചിനൊപ്പം പട്ടികയില്‍ ഇടം നേടിയത്. മാലിദ്വീപിലെ വൈറ്റ് സാന്‍ഡി ബീച്ചി, ഇന്തോനേഷ്യയിലെ പിങ്ക് ബീച്ച്, ബാലിയിലെ ഡയമണ്ട് ബീച്ച്, വിയറ്റ്‌നാമിലെ റ്റിറോപ് ബീച്ച്, ഫിലിപ്പീന്‍സിലെ പസിഫികോ ബീച്ച്, ശ്രീലങ്കയിലെ സീക്രട്ട് ബീച്ച്, തായ്‌ലാഡിലെ ഹാറ് താം ഫ്രാനാംഗ് ബീച്ച്, ജപ്പാനിലെ സുനായമാ ബീച്ച് എന്നിവയും പട്ടികയില്‍ ഇടം നേടിയിട്ടുണ്ട്.
