പത്തനംതിട്ട : മൈലപ്രാ സര്വീസ് സഹകരണ ബാങ്ക് പ്രതിസന്ധിയിലായത്തോടെ ഭൂമാഫിയയും തലപൊക്കി. കോടികള് നിക്ഷേപമുണ്ടായിരുന്ന ചിലരാണ് തങ്ങളുടെ പണം എങ്ങനെയും കയ്ക്കലാക്കുവാന് പുതിയ തന്ത്രവുമായി രംഗത്ത് എത്തിയത്. ബാങ്കില് കിടപ്പാടം ഈട് വെച്ച് വായ്പ എടുത്തവരെയാണ് ഇവര് പ്രലോഭനത്തിലൂടെ വരുതിയിലാക്കുന്നത്. വായ്പാ കുടിശ്ശിക പെരുകിയതോടെ അടക്കുവാന് നിര്വാഹമില്ലാതെ പലരും ബുദ്ധിമുട്ടുകയാണ്. ബാങ്കില് സാമ്പത്തിക പ്രതിസന്ധി ആയതിനാല് കുടിശ്ശികക്കാരുടെമേല് സമ്മര്ദ്ദവുമുണ്ട്. ഈ അവസരമാണ് ഭൂമാഫിയ ഉപയോഗിക്കുന്നത്. ബാങ്കിലെ ചില ജീവനക്കാരുടെയും വിരമിച്ച ചിലരുടെയും പിന്തുണയോടെയാണ് ഭൂമാഫിയ മൈലപ്ര സഹകരണ ബാങ്കിലെ വായ്പക്കാരെ ചൊല്പ്പടിയിലാക്കുന്നത്. ഇവര്ക്ക് വന്തുക കമ്മീഷനും നല്കുന്നുണ്ട്.
കുടിശ്ശികക്കാരുടെ വായ്പതുക നിക്ഷേപത്തില് നിന്നും അടച്ചുതീര്ത്ത് മുന് ധാരണപ്രകാരം വസ്തുവും വീടും ഭൂമാഫിയ സ്വന്തമാക്കും. ഇത് ഉയര്ന്നവിലക്ക് മറിച്ചു വില്ക്കുകയാണ് പരിപാടി. ബാങ്കിന്റെ ജപ്തി നടപടിക്ക് കാലതാമസം ഉണ്ടെന്നകാര്യം മറച്ചുവെച്ചാണ് കുടിശ്ശികക്കാരെ ഇവര് വരുതിയിലാക്കുന്നത്. ഭൂമാഫിയയില് പെട്ടവരുടെ കോടികള് മൈലപ്രാ ബാങ്കില് നിക്ഷേപമായുണ്ട്. ബാങ്ക് പ്രതിസന്ധിയിലായത്തോടെ ഇവര് പരിഭ്രാന്തരാണ്. നിക്ഷേപത്തുക പുറത്തറിഞ്ഞാല് തങ്ങള്ക്ക് പിടിവീഴുമെന്ന് അറിയാമെന്നതിനാല് എങ്ങനെയും തങ്ങളുടെ നിക്ഷേപം ഊരിയെടുക്കുവാനാണ് ശ്രമം. നിരവധി കച്ചവടങ്ങള് ഇതിനോടകം നടന്നുകഴിഞ്ഞു. എട്ടോളം പേരുമായി ഇപ്പോള് ധാരണയിലുമായിട്ടുണ്ട്. മൈലപ്ര ബാങ്ക് പ്രതിസന്ധിയിലായത്തോടെ തടിച്ചുകൊഴുക്കുന്നത് ഭൂമാഫിയയാണ്. കുത്സിത ശ്രമങ്ങളിലൂടെ കുറഞ്ഞവിലയ്ക്ക് പലരുടെയും കിടപ്പാടം ഇവര് തട്ടിയെടുത്തു. കോടികളുടെ അനധികൃത സമ്പാദ്യത്തിന് ഉടമകളാണ് ഇവരില് ചിലര്.
