ആറന്മുള : സ്‌കൂട്ടറില്‍ കാറിടിച്ച് സുവിശേഷപ്രവര്‍ത്തകര്‍ മരണപ്പെട്ടു. പുനലൂര്‍ ഇടമണ്‍ ഉറുകുന്ന് മേരി വിലാസം ബെനന്‍സ് ഡേവിഡ് (43), ഇടുക്കി കട്ടപ്പന തോപ്രാംകുടി ചരുവിളയില്‍ വീട്ടില്‍ ജയിംസ് (പ്രസന്നന്‍ – 49) എന്നിവരാണ് മരിച്ചത്. മാവേലിക്കര – കോഴഞ്ചേരി സംസ്ഥാനപാതയില്‍ ആറന്മുള പുന്നംതോട്ടത്തിന് സമീപം ആയിരുന്നു അപകടം. ഇന്നലെ വൈകുന്നേരമായിരുന്നു അപകടം. ആറന്മുള ഭാഗത്തേക്ക് പോകുകയായിരുന്ന സ്‌കൂട്ടര്‍ മുന്നിലുണ്ടായിരുന്ന കാറിനെ മറികടക്കുന്നതിനിടെ എതിരെവന്ന കാറിന്റെ വശത്ത് തട്ടി ഇവര്‍ റോഡിലേക്ക് തെറിച്ചുവീഴുകയായിരുന്നെന്നാണ് പോലീസിന് ലഭിച്ച പ്രാഥമിക വിവരം.
ബെനന്‍സാണ് വാഹനം ഓടിച്ചിരുന്നത്. അപകടത്തില്‍ റോഡിലേക്ക് തെറിച്ചുവീണ ജയിംസിനെ തൊട്ടുപിന്നാലെ വന്ന വാഹനത്തില്‍ കോഴഞ്ചേരിയിലെ ജില്ലാ ആശുപത്രിയിലേക്ക് മാറ്റി. ബെനന്‍സിനെ ആശുപത്രിയിലേക്ക് മാറ്റാനായി പിന്നാലെയെത്തിയ വാഹനങ്ങള്‍ക്ക് കൈകാട്ടിയെങ്കിലും ആരും നിര്‍ത്താന്‍ തയാറായില്ലെന്ന് നാട്ടുകാര്‍ പറഞ്ഞു. പിന്നീട് ഇതുവഴിയെത്തിയ കാറില്‍ ജില്ലാ ആശുപത്രിയില്‍ എത്തിക്കുകയായിരുന്നു. മൃതദേഹങ്ങള്‍ ജില്ലാ ആശുപത്രി മോര്‍ച്ചറിയില്‍.
