തിരുവല്ല: അയല്‍വാസിയോടുള്ള മുന്‍ വൈരാഗ്യം തീര്‍ക്കാന്‍ ഒന്നര ലക്ഷത്തോളം രൂപ വില മതിക്കുന്ന ബൈക്ക് കത്തിച്ച സംഭവത്തില്‍ പ്രതിയെ പോലീസ് അറസ്റ്റ് ചെയ്തു. നിരണം കൊമ്പങ്കേരി വീട്ടില്‍ ബിജി ചാക്കോ (32) ആണ് പിടിയിലായത്. കൊമ്പങ്കേരി മാനാങ്കേരില്‍ വീട്ടില്‍ സോമേഷ് സോമന്റെ പള്‍സര്‍ ബൈക്കാണ് പൂര്‍ണമായും കത്തി നശിച്ചത്. വ്യാഴാഴ്ച അര്‍ദ്ധരാത്രിയോടെ ആയിരുന്നു സംഭവം. ബൈക്കിന് തീ പിടിക്കുന്നത് കണ്ട് പുറത്തിറങ്ങിയ സോമേഷ് വീട്ടുമുറ്റത്ത് നിന്നും ബിജി ചാക്കോ ഓടിപ്പോകുന്നത് കണ്ടു.
പോലീസ് നടത്തിയ അന്വേഷണത്തില്‍ വീടിന് സമീപത്ത് നിന്നും ഇന്ന് പുലര്‍ച്ചെയോടെ ബിജിയെ കസ്റ്റഡിയില്‍ എടുക്കുകയായിരുന്നു. ആലപ്പുഴയില്‍ നിന്നും ഫോറന്‍സിക് വിഭാഗമെത്തി പ്രാഥമിക പരിശോധനകള്‍ നടത്തി. പിടിയിലായ ബിജിക്കെതിരെ പുളിക്കീഴ് സ്‌റ്റേഷനില്‍ മാത്രം രണ്ട് ക്രിമിനല്‍ കേസുകള്‍ നിലവിലുണ്ടെന്ന് പോലീസ് പറഞ്ഞു. സി.ഐ ഇ .ഡി ബിജുവിന്റെ നിര്‍ദേശ പ്രകാരം എസ്. ഐ പി.കെ കവിരാജ്, എ.എസ്.ഐ മാരായ സദാശിവന്‍, പ്രകാശ്, സി.പി. ഒമാരായ നവീന്‍, പ്രദീപ്, സി.വി പ്യാരീലാല്‍, രജീഷ് എന്നിവരടങ്ങുന്ന സംഘമാണ് പ്രതിയെ പിടികൂടിയത്.
