കൊച്ചി: ജപ്പാനില് അന്തരിച്ച ആര്ച്ച്ബിഷപ്പ് ഡോ. ജോസഫ് ചേന്നോത്തിന്റെ സംസ്കാരം ഇന്ന്. ഉച്ചകഴിഞ്ഞ് 2.30നു മാതൃ ഇടവകയായ ചേര്ത്തല കോക്കമംഗലം സെന്റ് തോമസ് പള്ളിയിലാണു സംസ്കാര ശുശ്രൂഷകള്. ടോക്കിയോയില് നിന്നു ദോഹ വഴി ഖത്തര് എയര്വേസ് വിമാനത്തില് ഇന്നലെ രാവിലെ 11.40നാണു ഭൗതികദേഹം കൊച്ചി അന്താരാഷ്ട്ര വിമാനത്താവളത്തില് എത്തിച്ചത്. എറണാകുളം ലിസി ആശുപത്രി മോര്ച്ചറിയില് സൂക്ഷിച്ച ഭൗതികദേഹം ഇന്നു രാവിലെ ഏഴു മുതല് എട്ടുവരെ ആശുപത്രി ചാപ്പലില് പൊതു ദര്ശനത്തിനു വയ്ക്കും. 8.30 മുതല് 9.30 വരെ എറണാകുളം സെന്റ് മേരീസ് ബസിലിക്ക കത്തീഡ്രല് പള്ളിയിലും പൊതുദര്ശനത്തിനു സൗകര്യമുണ്ടാകും.
11.30നു ഭൗതികദേഹം കോക്കമംഗലത്തുള്ള മാര് ചേന്നോത്തിന്റെ വസതിയിലെത്തിക്കും. 12.30നു മാതൃ ഇടവകയായ കോക്കമംഗലം സെന്റ് തോമസ് പള്ളിയിലേക്കു കൊണ്ടുവരും. പള്ളിക്കകത്തു ക്രമീകരിച്ചിട്ടുള്ള പ്രത്യേക കല്ലറയിലാണു ഭൗതികദേഹം കബറടക്കുന്നത്. ഉച്ചകഴിഞ്ഞ് 2.30നു ദിവ്യബലിയോടുകൂടിയാണു സംസ്കാരശുശ്രൂഷകള് ആരംഭിക്കുക. 2011 ഓഗസ്റ്റ് മുതല് ജപ്പാനിലെ അപ്പോസ്തോലിക് നുണ്ഷ്യോയായി സേവനമനുഷ്ഠിച്ച് വരികയായിരുന്നു.
