കോഴഞ്ചേരി : അയിരൂർ പഞ്ചായത്തിൽ പൂർണമായും കഴിഞ്ഞ രണ്ടാഴ്ചയായി കുടിവെള്ളവിതരണം മുടങ്ങിക്കിടക്കുന്നതിനെതിരേ ബിജെപി അയിരൂർ പഞ്ചായത്ത് കമ്മിറ്റി പഞ്ചായത്ത് ഓഫീസിന് മുമ്പിൽ ധർണ നടത്തി. അയിരൂർ കാഞ്ഞീറ്റുകര ശുദ്ധജലപദ്ധതിയുടെ പമ്പിങ് ചേമ്പറിൽ ചെളി അടിഞ്ഞുകൂടിയതിനെ തുടർന്നാണ് പമ്പിങ് മുടങ്ങിയത്. നിർമാണത്തിലെ അശാസ്ത്രീയതയും അഴിമതിയും കാലാകാലങ്ങളായി പദ്ധതിയുടെ സംരക്ഷണത്തിലെ കെടുകാര്യസ്ഥതയും അഴിമതിയുമാണ് ജനങ്ങൾക്ക് ഈ ദുരിതപൂർണമായ സാഹചര്യമുണ്ടാക്കിയതെന്ന് ധർണ ഉദ്ഘാടനം ചെയ്ത ബിജെപി ജില്ലാ പ്രസിഡന്റ് അഡ്വ. വി.എ. സൂരജ് കുറ്റപ്പെടുത്തി.
പഞ്ചായത്ത് കമ്മിറ്റി പ്രസിഡന്റ് അജയ് ഗോപിനാഥ് അധ്യക്ഷത വഹിച്ചു. ജില്ലാ ജനറൽ സെക്രട്ടറി പ്രദീപ് അയിരൂർ, സംസ്ഥാന കൗൺസിൽ അംഗം എം. അയ്യപ്പൻകുട്ടി, കർഷകമോർച്ച സംസ്ഥാന ട്രഷറർ ജി. രാജ്കുമാർ, പഞ്ചായത്ത് ജനറൽ സെക്രട്ടറി സുരേഷ് ബാബു, വൈസ് പ്രസിഡന്റ് ദിലീപ് അയിരൂർ, മണ്ഡലം ജനറൽ സെക്രട്ടറിമാരായ എസ്. ആശ, അരുൺകുമാർ, ജനപ്രതിനിധികളായ ജയശ്രീ പ്രഭ, അനുരാധാ ശ്രീജിത്ത്, എൻ.ജി. ഉണ്ണികൃഷ്ണൻ, എം.പി. സോമശേഖരൻ എന്നിവർ പ്രസംഗിച്ചു.
