തൃശ്ശൂര്: കുറ്റങ്ങള് ഒന്നും ചെയ്യാത്തവര്ക്ക് ആരേയും ഭയപ്പെടേണ്ട കാര്യമില്ലെന്ന് ബിജെപി നേതാവ് ബി.ഗോപാലകൃഷ്ണന്. തോമസ് ഐസക്ക് മുന് ധനകാര്യ മന്ത്രിയെന്ന പ്രത്യേക പരിരക്ഷ വേണമെന്ന് ചിന്തിക്കുകയും അന്വേഷണ ഏജന്സിയെ പാര്ട്ടി പ്രവര്ത്തകരെ കൊണ്ട് നേരിടുമെന്ന് പറയുകയും ചെയ്യുന്നത് മുന് ധനമന്ത്രിക്ക് യോഗ്യമല്ലെന്നും അദ്ദേഹം പറഞ്ഞു. വിജയ് മണ്ഡല് ചൗധരി – യൂണിയന് ഓഫ് ഇന്ത്യ കേസ്സില് സുപ്രീം കോടതിയുടെ ഉത്തരവ് പ്രകാരം ഒരു വ്യക്തിക്ക് ഇ.ഡി. നോട്ടീസ് അയക്കുന്നതിന് മുന്പോ നോട്ടീസിലോ കാരണം പറയേണ്ടതില്ലെന്ന് വ്യക്തമാക്കുന്നുണ്ട്. മാത്രമല്ല, ഇ ഡി തയ്യാറാക്കുന്ന മൊഴി ഒരു കാരണവശാലും ഭരണഘടന വ്യക്തിക്ക് നല്കുന്ന സ്വാതന്ത്ര്യത്തിനോ അവകാശങ്ങള്ക്കോ ക്ഷതം എല്പ്പിക്കുന്നില്ലെന്നും ഇത് ഒരു ഇന്റേണല് രേഖ മാത്രമാണെന്നും വിധിന്യായത്തില് ചൂണ്ടികാണിക്കുന്നുണ്ട്.
കപില് സിബല് സുപ്രീം കോടതിയില് ഉന്നയിച്ച വാദങ്ങളാണ് ഇപ്പോള് ഐസക്ക് ഉന്നയിക്കുന്നത്. എന്തിനാണ് ഐസക്കിന്റെ കുടുംബ വിവരങ്ങള് തേടുന്നതെന്നാണ് മറ്റൊരു ചോദ്യം. ഐസക്ക് ഉത്തരം പറയേണ്ട ചില ചോദ്യങ്ങള് ഉണ്ട്. തോമസ് ഐസക്ക് എന്ന കേരളത്തിന്റെ മുന് ധനമന്ത്രിക്ക് ഭയമല്ല വേണ്ടത്. നിര്ഭയത്തോടെ ചോദ്യങ്ങള്ക്ക് ഉത്തരം കൊടുക്കുകയാണ് വേണ്ടതെന്നും ഗോപാലകൃഷ്ണന് പറഞ്ഞു.
