അഹമ്മദാബാദ്: ഗുജറാത്തിലെ വല്‍സാദില്‍ ബി.ജെ.പി നേതാവ് വെടിയേറ്റ് മരിച്ചു. വല്‍സാദില്‍ ക്ഷേത്രത്തില്‍ പ്രാര്‍ത്ഥന കഴിഞ്ഞ് കുടുംബത്തോടൊപ്പം മടങ്ങുകയായിരുന്ന നേതാവിന് നേരെ വെടിയുതിര്‍ക്കുകയായിരുന്നു. വാപ്പിയിലെ റാറ്റയിലെ ബിജെപി വൈസ് പ്രസിഡന്റ് ശൈലേഷ് പട്ടേലാണ് മരിച്ചത്. ക്ഷേത്രത്തില്‍ നിന്ന് മടങ്ങുമ്പോള്‍ ബൈക്കിലെത്തിയ അക്രമികള്‍ ശൈലേഷിനു നേരെ വെടിയുതിര്‍ക്കുകയായിരുന്നു. മോട്ടോര്‍ ബൈക്കിലെത്തിയ അക്രമികള്‍ നാല് റൗണ്ട് വെടിയുതിര്‍ത്തതായാണ് റിപ്പോര്‍ട്ട്.
വ്യക്തി വൈരാഗ്യമാണ് കൊലപാതകത്തിന് പിന്നിലെന്നാണ് സൂചന. അതേസമയം മൃതദേഹം ഏറ്റുവാങ്ങാന്‍ നേതാവിന്റെ കുടുംബം വിസമ്മതിച്ചു. പ്രതികളെ പിടികൂടി നീതി ലഭിക്കും വരെ മൃതദേഹം ഏറ്റുവാങ്ങില്ലെന്ന് കുടുംബം അറിയിച്ചു. പകല്‍വെളിച്ചത്തില്‍ ഇത്തരം സംഭവങ്ങള്‍ ഉണ്ടായാല്‍ ഉത്തര്‍പ്രദേശും ഗുജറാത്തും തമ്മിലുള്ള വ്യത്യാസം എന്തായിരിക്കുമെന്ന് ബന്ധുക്കള്‍ ചോദിച്ചു.
