കോഴിക്കോട് : മുഖ്യമന്ത്രി പിണറായി വിജയന് നടത്തിവരുന്ന കേരളപര്യടനം കോഴിക്കോട്ട് ബ്ലഡ് പേഷ്യന്റ്സ് പ്രൊട്ടക്ഷന് കൗണ്സിലിന്റെ നേതൃത്വത്തില് തടയുമെന്ന് സംസ്ഥാന ജനറല് കണ്വീനര് കരീം കാരശ്ശേരി പറഞ്ഞു. തലാസീമിയ, ഹീമോഫീലിയ, സിക്കിള് സെല്, അനീമിയ പോലുള്ള മാരക രക്തജന്യ രോഗികളും രക്ഷിതാക്കളുമാണ് കേരളപര്യടനം തടയുന്നതിന് നേതൃത്വം നല്കുന്നത്.
കാല് നൂറ്റാണ്ടായി രക്തജന്യരോഗികളുടെ വിദഗ്ധ ചികിത്സക്കും ജീവന്രക്ഷ മരുന്നുകള്ക്കുമായി സംഘടന സമരം ചെയ്തുവരുകയാണ്. ജനാധിപത്യ മര്യാദപോലും ഭരണാധികാരികള് ഈ രോഗികളോട് കാണിച്ചിട്ടില്ല. നിരവധി രോഗികളാണ് മരുന്നും വിദഗ്ധചികിത്സയും ലഭിക്കാതെ അകാലത്തില് മരിച്ചത്.
ജീവന് രക്ഷ മരുന്നുകളും വിദഗ്ധചികിത്സയും ലഭിക്കാതെ കഴിഞ്ഞ അഞ്ചു മാസത്തിനിടെ പത്ത് തലാസീമിയ രോഗികളാണ് മരിച്ചത്. ഹീമോഫീലിയ, സിക്കിള് സെല് അനീമിയ രോഗികളുടെ സ്ഥിതിയും മറിച്ചല്ല. അവഗണനയില് പ്രതിഷേധിച്ചാണ് രോഗികളും രക്ഷിതാക്കളും മുഖ്യമന്ത്രിയുടെ കേരള പര്യടനം തടയാന് തയാറെടുക്കുന്നതെന്നും സംഘടന അറിയിച്ചു.