തിരുവനന്തപുരം: എംഎല്എ സ്ഥാനം രാജിവെച്ചു ദേശീയ രാഷ്ട്രീയത്തില് ചുവടുറപ്പിക്കാന് പോയ പികെ കുഞ്ഞാലിക്കുട്ടി വീണ്ടും സംസ്ഥാന രാഷ്ട്രീയത്തിലേക്ക് വരുന്നതായി സൂചന. സംസ്ഥാനത്ത് സജീവമാകുന്നതിന്റെ ഭാഗമായി കുഞ്ഞാലിക്കുട്ടി തന്റെ എംപി സ്ഥാനം രാജിവെക്കാനൊരുങ്ങുന്നുവെന്നാണ് സൂചനകള്. ഇക്കാര്യം ലീഗിന്റെ നേതൃയോഗം ചര്ച്ച ചെയ്യുകയാണ്.
നേതൃയോഗത്തില് ധാരണയായാല് പ്രവര്ത്തക സമിതിയില് തീരുമാനം പ്രഖ്യാപിക്കും.ഇ അഹമ്മദിന്റെ നിര്യാണത്തെ തുടര്ന്നായിരുന്നു കുഞ്ഞാലിക്കുട്ടി മലപ്പുറത്തുനിന്ന് ലോക്സഭയിലെത്തിയത്. വേങ്ങരയിലെ എംഎല്എ സ്ഥാനം രാജിവെച്ചായിരുന്നു പാര്ലമെന്റിലെത്തിയത്. 2019 ല് യുപിഎ അധികാരത്തിലെത്തിയാല് കേന്ദ്രമന്ത്രിയാകാമെന്ന മോഹവുമായാണ് കുഞ്ഞാലിക്കുട്ടി തന്റെ പ്രവര്ത്തന മേഖല ഡല്ഹിയിലേക്ക് കേന്ദ്രീകരിച്ചത്.
എന്നാല് വന് ഭൂരിപക്ഷത്തോടെ നരേന്ദ്ര മോദി വീണ്ടും അധികാരത്തിലെത്തിയതോടെ കുഞ്ഞാലിക്കുട്ടിയുടെ മോഹം പൊലിഞ്ഞു. സംസ്ഥാന രാഷ്ട്രീയത്തിലേക്ക് മടങ്ങാനുള്ള തീരുമാനത്തിന് പിന്നില് ഈ കാരണം കൂടിയുണ്ടെന്നാണ് രാഷ്ട്രീയ നിരീക്ഷകര് പറയുന്നത്.
അതേസമയം ഇപ്പോഴത്തെ സാഹചര്യത്തില് കുഞ്ഞാലിക്കുട്ടി സംസ്ഥാനത്ത് ആവശ്യമാണെന്നാണ് ലീഗിന്റെ വിലയിരുത്തല്. അതേസമയം കുഞ്ഞാലിക്കുട്ടിയെ ഉപയോഗിച്ച് യുഡിഎഫിനെ ഹൈജാക്ക് ചെയ്യാനുള്ള ശ്രമത്തിലാണ് ലീഗെന്ന ആരോപണം ഉയര്ന്നു കഴിഞ്ഞു. യുഡിഎഫിന് ഭരണം ലഭിച്ചാല് ഉപമുഖ്യമന്ത്രി പദം വരെ ലീഗ് ആവശ്യപ്പെടുമെന്നും ആരോപണം ഉയര്ന്നിട്ടുണ്ട്.
