ഭോപ്പാല്‍: മധ്യപ്രദേശ് ആരോഗ്യമന്ത്രി പ്രഭുറാം ചൗധരിക്ക് കോവിഡ് സ്ഥിരീകരിച്ചു. ഇക്കാര്യം ട്വിറ്ററിലൂടെയാണ് മന്ത്രി അറിയിച്ചത്. താനുമായി സമ്പര്‍ക്കത്തില്‍ ഏര്‍പ്പെട്ട എല്ലാവരും നിരീക്ഷണത്തില്‍ പോകണമെന്ന് പ്രഭുറാം ചൗധരി ആവശ്യപ്പെട്ടു. മുഖ്യമന്ത്രി ശിവരാജ് സിങ് ചൗഹാന് നേരത്തെ കോവിഡ് സ്ഥിരീകരിച്ചിരുന്നു. മുഖ്യമന്ത്രിയെ കൂടാതെ മധ്യപ്രദേശില്‍ കോവിഡ് സ്ഥിരീകരിക്കുന്ന ഏഴാമത്തെ മന്ത്രിയാണ് പ്രഭുറാം ചൗധരി.
തൊഴില്‍ വകുപ്പ് മന്ത്രി ഗോപാല്‍ ഭാര്‍ഗവ്, മെഡിക്കല്‍ വിദ്യാഭ്യാസ വകുപ്പ് മന്ത്രി വിശ്വാസ് സാരംഗ്, സഹകരണ വകുപ്പ് മന്ത്രി അരവിന്ദ് ഭദോരിയ, ജലവകുപ്പ് മന്ത്രി തുള്‍സിറാം സിലവന്ത്, ഉന്നത വിദ്യാഭ്യാസ വകുപ്പ് മന്ത്രി മോഹന്‍ യാദവ്, പട്ടിക ജാതി-വര്‍ഗ്ഗ വകുപ്പ് മന്ത്രി രാംഖേല്‍വാന്‍ പട്ടേല്‍ എന്നിവര്‍ക്കാണ് നേരത്തെ മന്ത്രിസഭയില്‍ കോവിഡ് സ്ഥിരീകരിച്ചത്.
